وەزارەتا پێشمەرگە ب داخویانیەکێ، ئێریش و رەفتارا ئارتێشا ئیراقێ یا کو ل ناڤچەیا خورماتۆیێ ل دژی جوانەکی کورد ژ بەر بلندکرنا ئالا کوردستانێ پێک ئانیبوو، ب توندی شەرمەزار کر.
وەزارەتا پێشمەرگە ئیرۆ 11ێ مژدارێ د داخویانیەکێ دە راگهاند، رەفتارا ئارتێشا ئیراقێ یا ل هەمبەری ڤی جوانێ کورد “بنپێکرنەکە ئەشکەرە یا مافێن مرۆڤانە”. د داخویانیێ دە هات گۆتن: “ئالا کوردستانێ سەمبۆل و ناسنامەیا کوردستانێیە و ئەم پێ سەربلندن. هەروها، د دەستوورا ئیراقێ یا فەدەرال و دەمۆکراتیک دە ژی هاتیە ناسکرن، ژ بەر ڤێ یەکێ ت کەس خوەدی ماف نینە کو توندووتووژیێ ل هەمبەر کەسەکی کو ڤێ ئالێ هلددە، بکار بینە.”
وەزارەتا پێشمەرگە داخواز ژ ئالیێن یاسایی و فەرمانداریا ئۆپەراسیۆنێن هەڤبەش یا ئیراقێ دکە کو د زووترین دەم دە، تەدبیرێن لەزگین ژ بۆ لێپرسینەکە جدی ل سەر ڤێ بوویەرێ وەربگرن، کەسێن بەرپرسیارێن ڤێ رەفتارێ رادەستی یاسایێ بکن و رێ ل بەر دوبارەبوونا رەفتارێن ب ڤی رەنگی یێن نەرەوا بگرن، ژ بەر کو “ت خزمەتێ ژ ئارامی و پێکڤەژیانا پێکهاتەیان رە ناکە.”
