سەرۆک بارزانی: ھێڤیدارم ئەڤ ھلبژارتنە ئیراقێ بخە سەر رێیا راست
سەرۆک مەسعوود بارزانی ب پەیامەکێ پیرۆزباھی ل گەلێ کوردستانێ و ئیراقێ کر و سپاسیا ھێزێن ئەولەھیێ و ئالیگرێن پارتیا خوە کر ژ بۆ برێڤەچوونا ئاراما پرۆسەیێ.
سەرۆک مەسعوود بارزانی ئیرۆ 12ێ مژدارێ، ب بۆنەیا برێڤەچوونا سەرکەفتی یا ھلبژارتنێن پارلامەنتۆیا ئیراقێ، پیرۆزباھی ل وەلاتیێن کوردستانێ و تەڤاھیا ئیراقێ کر.
سەرۆک بارزانی د پەیاما خوە دە گۆت: “ب بۆنەیا سەرکەفتنا پرۆسەیا ھلبژارتنێن ئەنجومەنا نوونەران ئا ئیراقێ، ئەز پیرۆزباھیێ ل وەلاتیێن خوەشدڤی یێن کوردستانێ و تەڤاھیا ئیراقێ دکم. ھەروھا، ئەز پیرۆزباھیێ ل مالباتێن شەھیدان یێن سەربلند، پێشمەرگەیێن قەھرەمان و ھەموو چین و بەشێن جڤاکا کوردستانێ دکم.”
سەرۆک بارزانی د بەشەکا دن یا پەیاما خوە دە گۆت: “ئەز ب پێویست دزانم سپاسیا سەرکرداتی، ئەندام، کادر و ئالیگرێن پارتیا دەمۆکراتا کوردستانێ (پەدەکێ) بکم، ھەروھا سپاسیا دەزگەھێن ئەولەھیێ و ھەموو ئالیێن پێوەندیدار دکم کو ب وەستان و کەدا خوە، ژینگەھەکا ئارام ژ بۆ برێڤەچوونا پرۆسەسا ھلبژارتنێ ئافراندن.”
د داویا پەیامێ دە، سەرۆک بارزانی ھێڤیا خوە ئانی زمان کو “ئەڤ ھلبژارتن و ئەنجامێن وێ ببن سەدەم کو ئیراق بکەڤە سەر رێیا خوە یا راست.”
ئەڤ پەیاما سەرۆک بارزانی د دەمەکێ دە تێ کو پرۆسەسا دەنگدانا گشتی (11ێ مژدارێ) و یا تایبەت (9ێ مژدارێ) ب داوی بوویە. ل گۆری ئامارێن دەستپێکێ، پەدەکێ ب وەرگرتنا زێدەتری یەک ملیۆن و 80 ھەزار دەنگان، ل سەر ئاستا ھەرێما کوردستانێ و ئیراقێ سەرکەفتنەکا بەرچاڤ تۆمار کریە.
تێ پایین کو کۆمیسیۆنا ھلبژارتنان یا ئیراقێ ئیرۆ دانێ ئێڤارێ ئەنجامێن دەستپێکێ ب ئاوایەکی فەرمی راگھینە.
