د پەیاما خوە دە، عەبدی ب ئاوایەکی تایبەت سپاسیا سەرۆک ترامپ کر ژ بۆ “سەرکێشیا وی یا ل سووریەیێ و دانا دەرفەتێ ژ گەلێ سووری رە.”
عەبدی د پەیاما خوە دە ئەشکەرە کر، وی پێوەندیەکا تەلەفۆنی یا “سەرکەفتی” لگەل بالیۆز تۆم باڕاک پێک ئانیە. د ڤێ پێوەندیێ دە ژی ئەنجامێن جڤینا سەرۆکێ ئامەریکایێ دۆنالد ترامپ و سەرۆکێ سووریەیێ ئەحمەد شەرع یا ل کۆشکا سپی ھاتنە گۆتووبێژکرن و تەکەزی ل سەر لەزکرنا تەڤلیبوونا ھەسەدێ ھاتیە دوبارەکرن.
فەرماندارێ گشتی یێ ھەسەدێ بال کشاند سەر گرینگیا تەڤلیبوونا سووریەیێ بۆ ناڤ ھەڤپەیمانیا ناڤدەولەتی یا ل دژی داعشێ و ئەڤ یەک وەکە “پێنگاڤەکا بنگەھین” بناڤ کر و دا زانین کو ئەڤ پێنگاڤ دێ ھەولێن ھەڤبەشێن ژ بۆ “تێکبرنا ماییندە یا داعشێ و ژناڤبرنا گەفێن وێ ل سەر ھەرێمێ” خورتر بکە.
د داویا داخویانیا خوە دە، مەزلووم عەبدی تەکەز کر کو ئەو ب ئاوایەکی جدی و ب ھەڤاھەنگیەکا خورت لگەل ھەڤکارێن خوە دخەبتن. ئارمانجا سەرەکی یا ڤان ھەولدانان، وەکە کو وی ئانیە زمان، ئاڤاکرنا “پێشەرۆژەکا گەشتر و ئەولەتر ژ بۆ گەلێ مە د ناڤ سووریەیەکا یەکبوویی دە”یە.
سەرۆکێ سووریەیێ ئەحمەد شەرع رۆژا 10ێ مژدارێ ل کۆشکا سپی ژ ئالیێ سەرۆکێ ئامەریکایێ دۆنالد ترامپ ڤە ھاتبوو پێشوازیکرن. وەزارەتا دەرڤە یا سووریەیێ ب داخویانیەکێ راگھاند، ھەر دو ئالیان ل سەر جیبجیکرنا “پەیمانا 10ێ ئادارێ” ل ھەڤ کرنە.
