ژ بۆ ھەڤسەرۆکێ دەم پارتیێ یێ ئیدرێ 13 جاران سزایێ زیندانکرنا ھەتاھەتایێ ھات برین

ھەڤسەرۆکێ بەرێ یێ رێخستنا دەم پارتیێ یێ ئیدرێ محەمەد سەلچوک، د دۆزا کو تێ دە دھات دارزاندن دە، سزایەک گەلەک گران لێ ھات برین.

ل گۆری نووچەیا ئاژانسا مەزۆپۆتامیایێ، دادگەھا سزایێن گران یا یەکەمینا ئیدرێ، دوھ 14ێ مژدارێ د روونشتنا بریارێ دە، ژ بەر کوشتنا 13 پۆلیسان، 13 جاران سزایێ زیندانکرنا ھەتاھەتایێ یا گرانکری بۆ محەمەد سەلچوک دەرکر.

بوویەرا کو سەلچوک ژی تێدا دهێت دادگەهکرن، 9 سالان بەرێ ل ئیدرێ پێک ھاتبوو. د وێ بوویەرێ دە، ل نێزیکی دەریێ سینۆری یێ دلووجوویێ، د دەما دەرباسبوونا وەساییتا کو پۆلیس ڤەدگوھاستن دە، تەقەمەنیەک کو ل سەر رێ ھاتبوو بجھکرن، تەقیابوو و د ئەنجامێ دە 13 پۆلیسان جانێ خوە ژ دەست دابوون.

سەردۆزگەریا کۆمارێ یا ئیدرێ، پشتی کو 9 سال د سەر تەقینێ را دەرباس بوون، ل سەر بنگەھا سکالایەکێ، لێپرسین دابوو دەستپێکرن. د چارچۆڤەیا ڤێ لێپرسینێ دە، ھەڤسەرۆکێ بەرێ یێ دەم پارتیێ یێ ئیدرێ محەمەد سەلچوک سالا بۆری ھاتبوو بنچاڤکرن و پاشێ ھاتبوو گرتن.

سەلچوک، کو ھەتا رۆژا روونشتنا دادگەھێ، ل گرتیگەھا ئەلەزیزێ گرتی بوو، ب ڤێ بریارێ رە راستی یەک ژ سزایێن ھەری گران ھات.