پارتیا وەلاتپارێزێن کوردستانێ: ڤەشارتنا گۆرا سەید رزا نیشانا ترسا دەولەتێیە

پارتیا وەلاتپارێزێن کوردستانێ (PWK)، ب بۆنەیا سالڤەگەرا 88ێ یا شەھادەتا رێبەرێ بەرخوەدانا دێرسمێ سەیید رزا و ھەڤالێن وی، داخویانیەک بەلاڤ کر.

نڤێسینگەها راگەھاندنێ یا PWK ئیرۆ 15ێ مژدارێ د داخویانیا خوە دە تەکەز کر کو ڤەشارتنا جھێ گۆرێن رێبەرێن کورد نیشانا ترسا دەولەتا ترکە و راگھاند، تێکۆشینا ژ بۆ ئازادیا کوردستانێ ب کۆمکوژیان راناوەستە.

داخویانیا نڤێسینگەها راگەھاندنێ یا پارتییا وەلاتپاریزێن کوردستانێ:

ئەم سەیید رزا و ھەڤالێن وی ب رێزداری ب بیر تینن

88 سال بەرێ، د رۆژا 15/11/1937ێ دە رێبەرێ قەھرەمانێ بەرخوەدانا دێرسمێ سەیید رزا و 6 ھەڤالێن وی ل ئەلەزیزێ، ل مەیدانا ئەراسەیا گەنم ھاتن سیدارەدان.

دەولەتا ترکییەیێ، دگۆت قەی ب کوشتنا سەیید رزا و کورێ وی رەسک حوسەین، حوسێنێ دەمەنانی، حەسەن و سەیید حوسێنێ قورەیشانی، عەلییێ کالانی و فندک ئاغایێ یووسفانی، ئەو دێ گەلێ کورد یێ قەدیم و خوەدییێ کولتورەکێ ب ھێز قر بکن و ژ ناڤێ راکن.

دەولەتا ترکییەیێ ب دەهان هەزار ژن و زارۆک و کال و پیر دانە بەر گولـلەیان، قەتل کرنە

ب گۆتنا کەسێن کو ئەنجامدەرێن کۆمکوژییێ بوونە، ب ژەھرا مشکان گەلێ مە قر کرنە. لێ دەولەتا ترکییەیێ ھەر وەکی یێ شێخ سەعید و ھەڤالێن وی، جیھێ مەزەلێن سەیید رزا و ھەڤالێن وی ژی ڤەشارتن و ھەتا ئیرۆ ژی جیھێ مەزەلێن وان نایێ زانین. ئەڤ ژی نیشانا وێ یەکێیە کو دەولەتا ترکییەیێ چقاس ژ رێبەرێن ملەتێ کورد دترسە.

ھەلبەتە کو تێکۆشینا ئازادییا کوردستانێ ب قەتلیعام و جینۆسایدان رانەوەستییایە.

نەڤییێن شێخ سەعید، سەیید رزا، خالد بەگێ جبری، ئیحسان نووری پاشا، قازی محەمەد، مەلا مستەفا بارزانی ئیرۆ ژی ئالایا تێکۆشینێ ل ھەر چار پەرچەیێن کوردستانێ ب خوینا شەھیدان، ب کەد و خەباتا دلسۆزانەیا وەلاتپەروەران ھەر بلند دکن.

د سالڤەگەرا 88ێ یا قەتلکرنا وان دە، د شەخسێ سەیید رزا دە ئەم ھەموو شەھیدێن کوردستانێ ب رێز و ھورمەت ببیرتینن.