مەزلووم عه‌بدی ژ کۆربەندێ مێپسێ: سووریەیا نەناڤەندی راستیەکە
فەرماندارێ گشتییێ هێزێن سووریا دەمۆکراتیک (هه‌سه‌دێ) مەزلووم عه‌بدی، ئیرۆ 19ێ مژدارا 2025ان، د رۆژا دویەم یا کۆربەندا ئاشتی و ئەولەهیا رۆژهلاتا ناڤین (مێپس 2025) دە گۆتارەک پێشکێش کر. عه‌بدی د ئاخافتنا خوە دە تەکەز کر کو داویا هەر شەری دیالۆگە و ژ بۆ جیبجیکرنا پەیمانا 10ێ ئادارێ یا ب شامێ رە، پێویستی ب ڤینەکە سیاسی یا خورت هەیە.
مەزلووم عه‌بدی د دەستپێکا ئاخافتنا خوە دە سپاسیا سەرۆکوەزیر مەسروور بارزانی و زانینگەها ئامەریکی یا کوردستانێ – دهۆک کر ژ بۆ ڤەخوەندنا وی و گۆت: “پێشوازیەکە گەلەکی گەرم ل من هات کرن و ئەز ب ڤێ بەشداریێ گەلەکی کێفخوەشم.”
عه‌بدی تەکەزی ل سەر گرینگیا دیالۆگێ کر و گۆت: “داویا هەر شەری دیالۆگە. هەتا ئەگەر تو د شەر دە ب سەر ژی بکەڤی، دڤێ تو سەری ل دیالۆگێ بدی. سەدەما سەرەکە یا رووخاندنا رەژیما بەشار ئەسەد رەدکرنا دیالۆگێ و سیستەما ناڤەندی بوو.” هەروها دا زانین کو “ژ دەستپێکا بوویەرێن سووریەیێ ڤە ئەم ل دژی شەر بوون و هەتا کو شەر ل سەر مە نەهات فەرزکرن، مە شەر نەکر.”
فەرماندارێ هه‌سه‌دێ بال کشاند سەر پەیمانا کو د 10ێ ئادارێ دە ب سەرۆککۆمارێ سووریەیێ ئەحمەد شەرع رە ئیمزە کرنە و گۆت: “ئەو پەیمانێ رێ ل بەر شەرەکی دژوار گرت، پێشی ل پەرچەبوونا سووریەیێ گرت و رێ نەدا کو ناکۆکی د ناڤبەرا پێکهاتەیان دە دەرکەڤن.”
هەروها دا زانین ژی، ژ بۆ جارا یەکەم د 100 سالێن بۆری دە، د وێ پەیمانێ دە بەهسا پرسا کورد هاتیە کرن و هاتیە تەکەزکرن کو “دڤێ مافێن گەلێ کورد و هەموو پێکهاتەیان د چارچۆڤەیا دەستوورا نوو یا سووریەیێ دە وەرن دابینکرن.”
مەزلووم عه‌بدی ب ئاوایەکی زەلال نەخشەرێیا پاشەرۆژا سووریەیێ خێز کر و گۆت: “وسا دخویە کو پشتی 15 سالێن شەر، سووریە نکارە ڤەگەرە سەر سیستەما ناڤەندی یا مینا سەردەما رەژیما بەعس. دڤێ سووریەیەکە نەناڤەندی هەبە کو هەر هەرێم بکاربە خوە ب خوە ب رێڤە ببە. ئەڤ یەک بوویە راستیەکە کو نایێ ئینکارکرن و دڤێ هەر کەس ڤێ راستیێ قەبوول بکە و ل گۆری وێ پێنگاڤان باڤێژە.”
