مەسروور بارزانی: دڤێت دەستوورەک ل سووریەیێ ھەبە و مافێن ھەمیان پاراستی بن
سەرۆکێ حکوومەتا ھەرێما کوردستانێ تەکەز کر کو، سووریە وەلاتەکێ پر نەتەوە و پر ئۆلە و دڤێت حکوومەتەکا تەڤگر ھەبە. ھەروەسا گۆت: “دڤێت سووریەیێ دەستوورەک ھەبە کو مافێن ھەمیان بپارێزە.”
سەرۆکێ حکوومەتا ھەرێما کوردستانێ مەسروور بارزانی ئیرۆ رۆژا چارشەم، 19ێ مژدارا 2025ێ، د ھەڤدیتنەکا تایبەت دە ل کێلەکا کۆربەندا مەپسێ گۆت: “سووریە وەلاتەکێ جودایە و پێکھاتەیێن گەلەک جودا تێ دە ھەنە.”
سەرۆکوەزیر مەسروور بارزانی ئاماژە ژی دا: “سووریە وەلاتەکێ پر نەتەوە و پر ئۆلە، دڤێ حکوومەتەکا تەڤگر ھەبە و ھەروەسا دڤێت دەستوورەک ھەبە کو مافێن ھەمیان بپارێزە و گارانتیێ بدە ھەمی ئالیان کو ئەو ھەمی وەلاتیێن وی وەلاتی نە.”
سەرۆکوەزیرێ ھەرێما کوردستانێ تەکەز ژی کر کو، سەپاندنا فکرەکێ ژ ئالیێ نەتەوەیەکێ ڤە چ دەمەکێ ئاشتی و تەناھیێ ل پەی خوە نایینە. ھێڤی ژی کر کو، دەستوورەکا نوو ژ بۆ سووریەیێ بێ نڤیساندن، کو نێرینێن ھەمی نەتەوەیان تێ دە ھەبن، دا کو ھەر کەس هەست بکن کو ئەو وەلاتێ وییە و تو کەسەک نایێ پاشگوھکرن.
مەسروور بارزانی ئاماژە ژی دا: “ژ بۆ حکوومەتا سووریەیێ کارەکێ گەلەک ژیرانە و حەکیمانەیە، ھەکە دیالۆگەکا تەڤگر ب ھەمی ئالیان رە دەست پێ بکە و فکرەکێ چێ بکە، لێ فکرا پارتیەکێ تەنێ نەسەپینە ژ بەر کو ئەو کار سەرکەفتی نابە.”
سەرۆکوەزیرێ ھەرێما کوردستانێ کێفخوەشیا خوە ب مێڤانکرنا ھەردو ئالیێن کورد؛ ‘ھەسەدێ و ئەنەکەسێ’ ل کۆربەندا مەپسێ ئانی زمان.
وی وھا دۆماند: “ئەڤ کۆربەند ژ بۆ وێ یەکێیە کو ئەم تەنێ نائاخڤن، لێ مە کریار ژی ھەنە، ھەروەسا ئەم دخوازین ئاشتیێ ب رێیا کریاران ب دەست بخن.”
مەسروور بارزانی ئەشکەرە ژی کر: “گەر ھەر کەس بزاڤێ بکە کو ب ڤی رەنگی بفکرە، واتە نە تەنێ گۆتن لێ کریار ژی ھەبن، ئەز دفکرم کو ئەڤ نھێنیا سەرکەفتنێیە.”
سەرۆکوەزیرێ ھەرێما کوردستانێ د پارەکا دن یا گۆتنێن خوە دە تەکەز ژی کر: “دڤێت چاڤێ مە گەلەک ل گەلێ مە بە، ل سەر بەرژەوەندیێن نەتەوەیی و وەلاتی، نە تەنێ بەرژەوەندیێن کەسی و پارتی.”
ھەروەسا گۆت: “دەما کو مە رێز ل ھەڤ گرت و مە باوەری ب پێکڤەژیانێ ھەبوو، وێ دەمێ ئەم ھەمی دکارین ب ھەڤ رە خورتتر ببن و بھێزتر ئاڤا بکن، ھەروەسا گوھەرتنا ھەری مەزن ژی دڤێت ل پێشیێ ژ ھوندور ڤە بێ کرن.”
مەسروور بارزانی د داویا ئاخافتنا خوە دە ژ ھەر کەسی رە سەرکەفتن خوەست و تەکەز کر: “کوردستان ل سەر رێیا راستە و ئەم بەر ب پێش ڤە دچن و تو کەسەک نکارە مە راوەستینە.”
