سەرۆک بارزانی: دڤێت پرسا کوردان ل سووریەیێ ب ئاوایەکێ دەمۆکراتیک و ئاشتیانە بێ چارەکرن
سەرۆک بارزانی تەکەز ل سەر بێھنفرەھی، تەبایی، یەکرێزیا ھێز و ئالیێن سییاسی یێن کوردان کر و ئاماژە دا کو، نابە مافێن گەلێ کورد بێن بنپێکرن. د ئەینی دەمێ دە ژی فەرماندارێ ھێزێن سوورییەیا دەمۆکراتیک و سەرۆکێ ئەنەکەسێ سپاسیا سەرۆک بارزانی کر، ژ بەر رۆلا وی د پاراستنا دۆزا رەوایا گەلێ کوردستانێ دە.
سەرۆک مەسعوود بارزانی ئیرۆ رۆژا چارشەمبێ، 19ێ مژدارا 2025ێ، ل باژارێ دھۆکێ ل کێلەکا کۆربەندا ئاشتی و ئەولەھیا رۆژھلاتا ناڤین (مەپس) پێشوازیا فەرماندارێ گشتییێ ھێزێن سووریەیا دەمۆکراتیک (ھەسەدێ) مەزلووم عەبدی کر.
بارەگایێ بارزانی د راگھاندنەکێ دە ئاماژە دایە: “د وێ جڤینێ دە، کو سەرۆکێ ئەنەکەسێ محەمەد ئیسماعیل، سیاسەتمەدارێ کوردێ باکورێ کوردستانێ عۆسمان بایدەمیر و چەند کەساتی و بەرپرسێن دن یێن رۆژئاڤایێ کوردستانێ ژی تێ دە ئامادە بووبوون، سەرۆک بارزانی بخێرھاتنا شاندا مێڤان کر و کێفخوەشیا خوە ئانی زمان کو ھەردو ئالی ب ھەڤ رە ل باژارێ دھۆکێ تەڤلی کۆربەندا مەپس 2025ێ بوون.”
ل گۆری وێ راگھاندنێ، ھەردو ئالیان سپاسیا سەرۆک بارزانی کر، ژ بەر رۆلا وی د پاراستنا دۆزا رەوایا گەلێ کوردستانێ دە، و د دوو رە ھەردو ئالیان ل سەر رەوشا سوورییەیێ و دەڤەرێ دیتن و نێرینێن خوە ل ھەڤ گوھەرتن.
سەرۆک بارزانی ئاماژە دا: “دڤێت پرسا کوردان د چارچۆڤەیا سووریەیا نوو دە ب ئاوایەکێ دەمۆکراتیک و ئاشتییانە بێ چارەسەرکرن و خەلەتیێن وێ نەیێن دوبارەکرن.”
سەرۆک بارزانی ھەروەسا تەکەز ل سەر بێھنفرەھی، تەبایی، یەکرێزیا ھێز و ئالیێن سییاسی یێن کوردان کر و ئاماژە دا کو، نابە مافێن گەلێ کورد بێن بنپێکرن.
د بەشەکا دن یا وێ جڤینێ دە، فەرماندارێ گشتی یێ ھێزێن سووریەیا دەمۆکراتیک (ھەسەدێ) سپاسیا سەرۆکوەزیرێ ھەرێما کوردستانێ مەسروور بارزانی کر کو ئەو ڤەخوەند کۆربەندا مەپس 2025ێ، ھەروەسا بەحسا رۆلا سەرۆک بارزانی ژ بەر بزاڤێن وی ژ بۆ نێزیکبوون و بدەستخستنا یەکرێزیێ د ناڤبەرا ئالیێن رۆژئاڤایێ کوردستانێ دە.
فەرماندارێ گشتی یێ ھێزێن سووریەیا دەمۆکراتیک (ھەسەدێ) پشتگریا ھەرێما کوردستانێ بلند نرخاند، کو د چەند سالێن بۆری دە دەریێ وێ ژ بۆ ھەواندنا گەلێ رۆژئاڤایێ کوردستانێ ڤەکری بوو، ھەروەسا پشتگریا ھەرێما کوردستانێ د تێکبرنا تەرۆرێ دە ژی بلند نرخاند.
خەتەریا دیسا سەرھلدانا داعشێ و پشتگریا پێڤاژۆیا چارەسەریا ئاشتیێ ل ترکیەیێ ژی د وێ جڤینێ دە ھاتن نیقاشکرن.
