کۆمیسیۆنا پێڤاژۆیێ سبە دەنگی ل سەر سەردانا ئیمرالیێ ددە

کۆمیسیۆنا ئاشتیێ یا پارلامەنتۆیا ترکیەیێ دێ سبە، 21ێ مژدارێ، د جڤینا خوە یا 18ەمین دە، ل سەر مژارا سەردانا ئیمرالیێ دەنگدانێ بکە. ئەڤ پێنگاڤ وەکە قۆناغەکە گرینگ د چارچۆڤەیا پرۆسەیا ئاشتیێ دە تێ دیتن.

جڤین دێ سبە ده‌مژمێر د 14:00ان دە د بن سەرۆکاتیا سەرۆکێ پارلامەنتۆیێ نوعمان کورتولموش دە برێڤە بچە. د جڤینێ دە، دێ کارێن کو کۆمیسیۆنێ هەتا نها کرنە وەرن نرخاندن و ل سەر پێنگاڤێن داهاتوو، ب تایبەتی ل سەر سەردانا ئیمرالیێ، وەرە ئاخافتن.

جیگرا سەرۆکێ کۆما دەم پارتیێ گولستان کلچ کۆچییگیت، پشتی جڤینا 18ێ مژدارێ، ژ رۆژنامەڤانان رە پشتراست کربوو کو “دێ د جڤینا رۆژا ئینێ دە ل سەر چوونا ئیمرالیێ دەنگدان وەرە کرن.”

ئەڤ جڤین پشتی جڤینا 17ەمین یا کۆمیسیۆنێ تێ، کو رۆژا 18ێ مژدارێ، ب ئاوایەکی گرتی هاتبوو لدارخستن. د وێ جڤینێ دە، وەزیرێ ناڤخوە عه‌لی یەرلیکایا، وەزیرێ بەرەڤانیێ یاشار گولەر و سەرۆکێ میتێ ئیبراهیم کالن ئامادە بوون و دەربارێ پێڤاژۆیێ دە زانیاری پێشکێشی پارلامەنتەران کربوون.

ل گۆری رێزکنامەیا کۆمیسیۆنێ، ژ بۆ پرانیا بریاران، دەنگێ پرانیا ئەندامێن بەشدار بەسە. ئەڤ تێ وێ واتەیێ کو ئەگەر پرانیا ئەندامێن کو بەشداری جڤینێ دبن، دەنگێ “ئەرێ” بدن، دێ بریارا سەردانا ئیمرالیێ وەرە پەسەندکرن.