دەمیرتاش: ئەز ئێدی ب سیاسەتمەدار و پارێزەران رە هەڤدیتنان ناکم
دەمیرتاش راگهاند کو ئەو دێ ئێدی ژ بلی هەڤالێن خوە یێن نێزیک، ب ت سیاسەتمەدار و پارێزەران رە هەڤدیتنێ نەکە.
دەمیرتاش سەدەما ڤێ بریارێ وەکی پێشیگرتنا ل “بەرەڤاژیکرن و ئیستسماران” نیشان دا.
بولەنت ئارنچ هەفتەیا بۆری ل گرتیگەها ئەدیرنەیێ هەڤسەرۆکێ گشتییێ بەرێ یێ هه‌ده‌پێ سه‌لاحه‌ددین دەمیرتاش زیارەت کر.
ئارنچ پشتی سەردانێ داخویانیەک دا و ئیدیعا کر کو دەمیرتاش دخوازە هەڤدیتنێ ب سەرۆککۆمارێ ترکیەیێ رەجەپ تاییپ ئەردۆگان بکە.
سه‌لاحه‌ددین دەمیرتاش ئیرۆ ب رێیا پارێزەرێن خوە ل سەر مەدیایا جڤاکی داخویانیەکە نڤیسکی بەلاڤ کر و بێیی کو ناڤ بدە ب ئاوایەکی توند نەرازیبوونا خوە یا ل هەمبەری وان کەسان ئانی زمان کو گۆتن و رامانێن وی بەرەڤاژی دکن و ل سەر ناڤێ وی داخویانیان ددن.
دەمیرتشا گۆت، «تشتێ کو هەری زێدە ل زۆرا من دچە ئەوە کو گۆتن و رامانێن کو من ئیما ژی نەکرنە، دخن سەر ناڤێ من و ژ رایا گشتی رە رادگهینن.”
دەمیرتاش دیار کر کو ئەو ژ هەلوەستا خوە یا ب روومەت تاویزێ نادە و وها گۆت: “دڤێ هەر کەس زانبە و پێ باوەر بە، ئەز ب روومەتا خوە، ب سەربلندی کەتم ڤر، من روومەتا خوە نەدا پەلخاندن و ئەز دێ دیسا ب سەربلندی دەرکەڤم ئان ژی هەتا رۆژا داوی یا ژیانا خوە ل ڤر بمینم”.
وی هەروها دا زانین کو 9 سالێن د هوجرەیێ دە زەهمەتیێن مەزن دیتنە لێ “پارچەبوونا ژ تێکۆشینا ئازادی، دەمۆکراسی و ئاشتیێ یا گەل، ل هەمبەری هەموو زەهمەتیان هێزا بەرخوەدانێ و ڤینەکە ژ پۆلا ددە.”
دەمیرتاش د داویا پەیاما خوە دە جارەکە دن بانگ کر و گۆت: “ت داخویانی، شیرۆڤە و رامانەکە کو من راستەراست پارڤە نەکربە، من گرێ نادە. ئەز خوە دسپێرم تێگهشتنا وە و دیار دکم کو ژ نها و پێ ڤە ئەز دێ ژ بلی هەڤالێن خوە، ب ت سیاسەتمەدار و پارێزەران رە هەڤدیتنێ نەکم، ژ بەر کو ژ بۆ پێشیگرتنا ل ڤان بەرەڤاژیکرن و ئیستسماران رێیەکە دن نەمایە.”
