مەزلووم عه‌بدی: ئالیکاریا باشوورێ کوردستانێ بۆ رۆژاڤایێ کوردستانێ گرینگە
فەرماندارێ گشتییێ هه‌سه‌دێ گرینگیا ئالیکاریا باشوورێ کوردستانێ ژ بۆ رۆژئاڤایێ کوردستانێ تەکەز کر و گۆت کو، تەڤلیبوونا وی د کۆربەندا مێپسێ دە ل دهۆکێ دە “گرینگ” و “دەستپێکا پێڤاژۆیەکا نوو”یە.
فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی د نووترین چاڤپێکەفتنا خوە یا رۆژنامەڤانی دە بەحسا تەڤلیبوونا خوە یا د گەرا شەشێ یا کۆربەندا مێپسێ دە ل باژارێ دهۆکێ، تێکلیێن د ناڤبەرا رۆژئاڤا و باشوورێ کوردستانێ دە، پێڤاژۆیا نوو یا ئاشتیێ ل باکورێ کوردستانێ و ترکیەیێ، تێکلبوونا هێزێن هه‌سه‌دێ د ناڤ ئارتێشا سووریەیێ دە و گەلەک مژارێن دن کر.
تەڤلیبوونا د گەرا شەشێ یا کۆنفەرانسا مێپسێ دە ل دهۆکێ
فەرماندارێ گشتییێ هێزێن سووریەیا دەمۆکراتیک (هه‌سه‌دێ) مەزلووم عه‌بدی رۆژا (چارشەم، 19ێ مژدارا 2025ێ) ل دهۆکێ تەڤلی رۆژا سێیێ یا گەرا شەشێ یا کۆربەندا ئاشتی و ئەولەهیا رۆژهلاتا ناڤین (مێپس25) بوو و تێ دە گۆتارەک ژی پێشکێش کر.
مەزلووم عه‌بدی سەردانا خوە یا دهۆکێ “گرینگ” و وەکی “دەستپێکا پێڤاژۆیەکا نوو” بناڤ کر و ئاماژە دا کو، رایەدارێن هەرێما کوردستانێ ب “گەرمی” پێشوازیا وی کریە.
وەکی کو فەرماندارێ هه‌سه‌دێ ئاماژە دا، “تەڤلیبوونا د کۆربەندەکا وەسا دە ل دهۆکێ ژ بۆ باکور و رۆژهلاتێن سووریەیێ گرینگ بوو. ئەم ل وێ باوەرێنە کو، ئەڤ دێ د تێکلیێن مەیێن ب باشوور رە دەستپێکەکا نوو بە و دێ پێشڤەچوون چێ ببە. ئەم تێکلیێن خوە یێن ب برایێن خوەیێن ل باشوورێ کوردستانێ رە ب ئاوایەکێ خوەزایی دبینن.”
جڤینێن وی یێن ب رایەدارێن هەرێما کوردستانێ رە
هەر د وێ رۆژێ دە کو ئەو تەڤلی کۆربەندا مێپسێ بوو، مەزلووم عه‌بدی ب ئاوایەکێ جودا ب ب سەرۆک بارزانی، سەرۆکێ هەرێما کوردستانێ نێچیرڤان بارزانی و سەرۆکوەزیرێ هەرێما کوردستانێ مەسروور بارزانی رە جڤیا.
مەزلووم عه‌بدی ل سەر ناڤەرۆکا جڤینێن خوە یێن ل گەل رایەدارێن هەرێما کوردستانێ دە ژی گۆت: “ئەڤنە جارا یەکێ بوو کو ئەم ب رایەدارێن هەرێما کوردستانێ رە جڤیان. ئەڤ بەردەوامیا سەردانێن بەرێ بوو. گەلەک مژارێن نوو و چالاک هەبوون کو مە نیقاش کرن. گەلەک مژارێن هەڤپار هەبوون کو ژ بۆ هەردو ئالیان گرینگ بوون. ب رەنگەکێ گشتی ژی یەکیتیا نەتەوەیی د رۆژەڤا مە دە هەیە، مە ل سەر ڤێ مژارێ نیقاش کرن.»
ناڤبری ئاماژە ژی دا کو، پێڤاژۆیا ئاشتیێ یا نوو ل باکورێ کوردستانێ و ترکیەیێ و تێکلیێن د ناڤبەرا رۆژئاڤایێ کوردستانێ و شامێ دە ژ وان مژاران بوون یێن کو د هەڤدیتنێن وی یێن ب رایەدارێن هەرێما کوردستانێ رە دە هاتنە نیقاشکرن.
فەرماندارێ هه‌سه‌دێ هەروەسا گۆت: «مە ل سەر ڤان هەمی مژاران نێرینێن هەڤ وەرگرتنە و مە تەکەز کریە کو، ئالیکاریا باشوورێ کوردستانێ ژ بۆ رۆژئاڤایێ کوردستانێ گرینگە. ئەم ل سەر ڤێ یەکێ ئاخڤین. ب رەنگەکێ گشتی، ئەم ل سەر دیالۆگ و ئاشتیێ، ئەو تشتێن کو ژ بۆ رۆژئاڤایێ کوردستانێ گرینگن و ژ بۆ باکورێ سووریەیێ گرینگن، تشتێن کو ژ بۆ کوردان ب گشتی گرینگن ئاخڤین. ئەنجامێن گشتی ئەرێنی بوون.»
تێکلیێن ئابۆرییێن د ناڤبەرا باشوور و رۆژئاڤایێ کوردستانێ دە
مەزلووم عه‌بدی ل سەر تێکلیێن ئابۆری یێن د ناڤبەرا باشوور و رۆژئاڤایێ کوردستانێ دە ژی گۆت: «ژ بۆ کو تێکلی و هاتن و چوون زێدەتر بهێز بن، ب رەنگەکێ گشتی ژی ل دەریێ سێمالکا، د پێڤاژۆیا دوبارە ئاڤاکرنا سووریەیێ و مژارێن ئابۆری دە دڤێ باشوورێ کوردستانێ رۆلەکا گرینگ بلیزە.»
ناڤبری تەکەز ژی کر: «ئەم جیرانێن هەڤن، برایێن هەڤن.نە تەنێ ژ بۆ باشوورێ کوردستانێ، بەلکی ژ بۆ کوردێن باکور و کوردێن دیاسپۆرایێ ژی، ژ بۆ کو بێن و ئەو ژی ل سەر کارێن دوبارە ئاڤاکرنا ب تایبەتی ل باکور و رۆژهلاتێ سووریەیێ رۆلەکا بهێزتر بلیزن، ئەم ل سەر ڤان مژاران راوەستان.»
