ھەڤسەرۆکا دەم پارتیێ: ئەڤ دانووستاندنە نە لگەل ئاکەپێ یان مەھەپێ نە، بەلکو لگەل دەولەتێ نە

ھەڤسەرۆکا پارتیا دەمێ تولای ھاتیمۆغولاری د پانەلا “دەمۆکراسی، ئاشتی و پێشەرۆژا ھەرێما مە” دە کو ل ناڤچەیا دەفنە یا ھاتایێ ھاتە لدارخستن، ئاخڤی و دەربارێ پێڤاژۆیێ دە گۆت، “دڤێت جەهەپە ب تەڤاھی بەشداری ڤێ پێڤاژۆیێ ببە. ئەڤ دانوستاندن نە لگەل ئاکەپێ یان مەھەپێ نە، بەلکو لگەل دەولەتێ نە و یێن کو د ناڤ ناکۆکیان دە نە لگەل ھەڤ دئاخڤن. دەما کو ئەم ل ھەموو ئەزموونێن ناکۆکی و چارەسەریێ یێن ڤێ دنیایێ دنێرین، یێن کو د ناڤ ناکۆکیان دە نە ل سەر مێزەی روودنن. دەولەت د ڤێ پێڤاژۆیێ دە موخاتابە، لێ دەولەت خوەدی دەستھلاتەک رێڤەبەریێ یە ژی. دەستھلاتا رێڤەبەریێ حکوومەتە، ژ بەر ڤێ یەکێ ئەڤ دانوستاندن نھا لگەل حکوومەتێ تێنە کرن.”

پانەلا ب ناڤێ “دەمۆکراسی، ئاشتی و پێشەرۆژا ھەرێما مە” ل ناڤچەیا دەفنە یا ھاتایێ ھاتە لدارخستن. ھەڤسەرۆکا پارتیا دەمێ تولای ھاتیمۆغولاری د پانەلێ دە ئاخڤی و دیار کر کو “پێڤاژۆیا ئاشتی و چارەسەریا دەمۆکراتیک”، کو زێدەتری سالەکێیە بەردەوام دکە، ب گاڤێن گرینگ پێشڤە دچە. ھاتیمۆغولاری، دیار کر کو خەباتا کۆمیسیۆنا پارلەمەنتۆیێ یا ل سەر مژارا “گوھدانا ئیمرالیێ” راوەستیایە و ئەڤ تشت گۆت:

“پێدڤی بوو کو دەنگێ ئیمرالیێ بێ بھیستن؛ ئەڤ وەکی شەرتەک ھات پێشکێشکرن. رێخستنا ئۆجالان ب خوە ژی وەکی شەرتەک پێشکێش کر و ئەڤ مژارە گھیشتیە ڤێ ئاستێ. ب راستی، دڤێت بەری چەند مەھان چوونا ئیمرالی هاتبا ئەنجامدان. کۆمیسیۆنێ بریارەک دا و نھا دچە. بێ گومان، مە دخوەست کو ئەڤ کۆمیسیۆن ب یەکدەنگی ڤێ بریارێ بدە، لێ ئەڤ یەک چێنەبوو. جەهەپێ بریار دا کو نەچە، و دووڤ رە یەنیۆل و وان ژی راگھاندن کو ئەوێ نەچن. ئەم گرینگیەک مەزن ددن چوونا جەهەپێ. مە ئەڤ یەک ل ھەر دەرێ و د ھەر جڤینێ دە گۆتیە. ئەم نەچوونا وان وەکی کێماسیەکێ دبینن. ئەم ھێڤی دکن هێژ کۆمسیۆن نەچوویی ئەو فکرا خوە بگوھەرینن.”