د ناڤبەرا مالباتا مەزلووم کۆبانی و پەکەکێ دە پەڤچوون دەرکەت
پشتی کو رێخستنا پەکەکێ کوشتنا یەک ژ چەکدارێن خوە ژ مالباتا وی ڤەشارتی، دەما مالاباتا وی ژ ئالیێ سازییا مالاباتێن شەهیدێن پەکەکێ ڤە تێ ئاگاهدارکرن کو کورێ وان هاتیە کوشتن، مالباتا مەزلووم کۆبانی ئێریشی سەر ئەندامێن ڤێ سازییا پەکەکێ دکن و وان ژ مالا خوە دەردخن.
چاڤکانیێن پێگەها دارکا مازی ئەشکەرە کرن، یەک ژ چەکدارێن پەکەکێ یێ ب ناڤێ مەحموود حەبەش مسی کو وەک “مەزلووم کۆبانی” تێ ناسکرن و ژ شێنیێن باژارۆکێ کۆبانیێ یێ سەر ب حەلەبێ ڤە یە، د سالا 2014 دە تەڤلی رەفێن یەپەگێ بوویە، پشترە د سالا 2018 دە پەکەکە ڤی چەکدارێ یەپەگێ ژ بۆی قەندیلێ ڤەدگوهێزە ژ بۆی کو پەروەردەهیێ ببینە، لێ بەلێ د ئۆپەراسیۆنەکا دەولەتا ترکیەیێ دە ئەڤ چەکدار جانێ خوە ژ دەست ددە و پەکەکە ژی ڤێ یەکێ ژ مالباتا وی ڤەدشێرە.
چاڤکانیێن دارکا مازی هەر وەها ئەشکەرە کرن، مالباتا مەحموود ژ سالا 2018 ڤر ڤە ژ چارەنڤسا کورێ خوە بێ خەبەر بوونە، لۆما مالباتا وی سەری ل سازیێن سەر ب پەکەکێ ڤە ددن و ل چارەنڤیسا کورێ خوە دپرسن، کادرۆیێن پەکەکێ ژ مالباتا وی رە دبێژن، مەحموود ڤەگەرییە باژارێ حەسەکێ و تەڤلی دەورەیەکە پەروەردەهیێ یا 6 مەهی بوویە.
لێ بەلێ، پشترە لیژنەیەکا سازییا مالباتێن شەهیدان یا پەکەکێ و یەپەگێ ل کۆبانیێ د رۆژا 14/11/2025 دە، سەرەدانا مالا بابێ مەحموود کو دکەڤە گوندێ دەگرمان دکن و وی ئاگاهداری رەوشا مەحموود دکن و ژێ رە دبێژن، مەحموود د سالا 2018 دە د دەما ئۆپەراسیۆنەکا لەشکەرێ ترکیەیێ ل چیایێ زاپێ هاتیە کوشتن، ئەڤ یەک ژی بوو سەدەم کو د ناڤبەرا مالباتا مەحموود و ئەندامێن سازییا مالباتێن شەهیدان یا پەکەکێ دە ئالۆزی دەرکەڤە.
چاڤکانێێن دارکا مازی تەکەز کرن، مالباتا مەحموود دەما ئاگەهداری رەوشا کورێ خوە بووین، ل ئەندامێن سازییا شەهیدان یا پەکەکێ خستیە و ژ مالا خوە دەرخستنە، هەر وەها مالباتا مەحموود ژ ئەندامێن ڤێ سازییا پەکەکێ رە گۆتنە، هوون چما ئەوقاس دەرەوان ل کوردان دکن، چما هوون پاش 7 سالان ژ نوو دە تێن و دبێژن کورێ وە د سالا 2018 دە هاتیە کوشتن، د دەمەکی دە کو پێش نها وە دگۆت تەڤلی دەورەیەکە پەروەردەهیێ بوویە؟
ب ئاوایەکی گشتی پەکەکە کوشتنا پرانییا چەکدارێن خوە ژ مالباتێن وان ڤەدشێرە، پەکەکە کوشتنا چەکدارێن خوە ب سالان ڤەدشیرە و پشترە ژ بۆی کو بازاریێ ب خوینا وان بکە و مالباتێن وان پێتر ب خوە ڤە گرێ بدە، ب هن مەراسیمێن تایبەت کوشتنا چەکدارێن خوە ژ مالاباتێن وان رە رادگهینە.
