مەسروور بارزانی پشتی ئێرشا ل سه‌ر كۆرمۆرێ ژ ئامەریکایێ سیستەما پاراستنێ خوەست
سەرۆکوەزیرێ هەرێما کوردستانێ مەسروور بارزانی ب توندی ئێریشا درۆنەیی یا ل سەر کێلگەها گازا کۆرمۆرێ شەرمەزار کر و هشیاری دا کو نابە تاوانبار وەکی جارێن بەرێ ب کەفالەت بێن ئازاد کرن. هەر وها داخوازا پەرگالێن بەرەڤانیێ ژ ئامەریکایێ کر.
سەرۆکوەزیر مەسروور بارزانی بەربانگا ئیرۆ 27ێ مژدارا 2025ان، ل سەر تۆرا جڤاکی یا Xێ پەیامەک دەربارێ ئێریشا شەڤا بۆری دە بەلاڤ کر.
مەسروور بارزانی نڤیسی: “ئەز ب توندترین شێوە ئێریشا ترسۆنەکانە یا بۆ سەر کێلگەها گازا کۆرمۆرێ شەرمەزار دکم و داخواز ژ حکوومەتا فەدەرال دکم کو تاوانباران ببینە و رادەستی دادگەهێ بکە.”
سەرۆکوەزیر تەکەز کر: “کی ل پشت ڤان ئێریشان بە، دڤێ رێ نەیێ دایین کو ڤان تاوانان دوبارە بکن ئان وەکی بەرێ، ب کەفالەت بێن ئازادکرن.”
د بەشەکە دن یا پەیاما خوە دە، سەرۆکوەزیرێ هەرێما کوردستانێ بانگ ل هەڤپەیمانێن ناڤدەولەتی کر و گۆت: “ئەز داخواز ژ هەڤبەشێن مە یێن ئامەریکی و ناڤدەولەتی دکم کو ئاموورێن بەرەڤانیێ یێن پێویست ژ بۆ پاراستنا ژێرخانه‌یا مە یا مەدەنی دابین بکن و پشتگریا مە بکن د گرتنا پێنگاڤێن جدی دە ژ بۆ رێگرتنا ل ڤان ئێریشێن ل سەر خەلکێ کوردستانێ.”
هلبەرینا گازێ راوەستیا
ژ ئالیێ دن ڤە، وەزارەتا ئەلەکتریکێ و وەزارەتا چاڤکانیێن سرووشتی ئیرۆ د داخویانیەکە هەڤبەش دە راگهاندن، ژ بەر ئێریشێ، هناردەکرنا گازێ ژ بۆ ویستگەهێن ئەلەکتریکێ ب تەمامی راوەستیایە.
داخویانیێ ئەشکەرە کر کو تیمێن وان ل گەل کۆمپانیا دانا گاز ل سەر خەتێنە ژ بۆ شۆپاندنا ئەنجامێن بوویەرێ و ئاساییکرنا رەوشێ.
شەڤا بۆری کێلگەها کۆرمۆرێ یا ل سینۆرێ چەمچەمالێ راستی ئێریشەکە درۆنەیی هات و ئاگر ب ئەمبارەکە گازێ کەت. ئەڤ یەک د دەمەکێ دەیە کو د چەند رۆژێن بۆری دە لڤ و تەڤگەرا درۆنەیان ل سەر ئاسیمانێ هەرێمێ هاتبوو دیتن.
