مەسروور بارزانی و سوودانی ئاخڤین: کۆمیتەیەکە هەڤپار تێ ئاڤاکرن

سەرۆکوەزیرێ ئیراقێ محەمەد شه‌یاع سوودانی ئێرشا ل قادا گازێ یا کۆرمۆرێ شەرمەزار کر و وەکی “ئێرشا ل سەر هەموو ئیراقێ” ب ناڤ کر.

هەولێر و بەغدایێ بریار دا کو ژ بۆ دیتنا ئێرشکاران کۆمیتەیەکە هەڤپار ئاڤا بکن.

دۆهـ ب شەڤ نێزیکی دەمژمێر 11:30ی ئێرشی قادا گازێ یا کۆرمۆرێ یا ل چەمچەمالێ هات کرن.

حکوومەتا هەرێما کوردستانێ راگهاند، سەرۆکوەزیرێ هەرێما کوردستانێ مەسروور بارزانی پێیوەندیەکە تەلەفۆنی ژ سەرۆکوەزیرێ ئیراقێ محەمەد شه‌یاع سوودانی وەرگرتیە.

ل گۆری داخویانیا حکوومەتا هەرێما کوردستانێ، سوودانی “ئێرشا ل قادا گازێ یا کۆرمۆرێ ب توندی شەرمەزار کر و وەکی ئێرشا ل سەر هەموو ئیراقێ ب ناڤ کر”.

د داخویانیێ دە هات دیارکرن کو هەر دو ئالیان ل سەر ئاڤاکرنا کۆمیتەیەکە هەڤپار ل هەڤ کریە و هات گۆتن:

“بریار هات دایین کو کۆمیتەیەکە لێکۆلینێ یا هەڤپار وەرە ئاڤاکرن.

ئەڤ کۆمیتە دێ د دەمەکە هەری نێزیک دە دەست ب کار بکە کو ئێرشکار وەرن دیتن، گرتن و جەزادان.”