نێچیرڤان بارزانی پێشوازیا شاندەکا ئه‌نه‌كه‌سێ کر
سەرۆکێ هەرێما کوردستانێ، د چارچۆڤەیا پێشوازیکرنا شاندەکا پایەبلند یا ئەنجوومەنا نەتەوەیی یا کورد ل سووریەیێ (ئه‌نه‌كه‌س) دە، تەکەز ل سەر گرینگیا یەکدەنگی و هەڤفێمکرنا د ناڤبەرا ئالیێن کوردی دە کر و راگهاند کو، پێکڤەژیان کلیلا تەناهیا سووریەیێ یە.
سەرۆکێ هەرێما کوردستانێ نێچیرڤان بارزانی پشتی نیڤرۆیا ئیرۆ (پێنجشەم، 27ێ مژدارا 2025ێ) ل هەولێرێ پێشوازیا دەستەیا سەرۆکاتیا ئه‌نه‌كه‌سێ کر، کو محەمەد ئیسماعیل سەرۆکاتیا وێ دکر.
ل گۆری راگهاندنا سەرۆکاتیا هەرێما کوردستانێ، شاندا مێڤان کورتیەک ل سەر پێشهاتێن داویێ یێن سیاسی و ئەولەهیا مەیدانا سووریەیێ، رەوشا کوردان و پێکهاتەیێن دن یێن وی وەلاتی ئەشکەرە کر. هەروەسا بال کشاند سەر رۆل و پێگەها ئەنجوومەنا خوە د پێڤاژۆیا سیاسی و دانوستاندنان دە.
ل بەرانبەری وێ یەکێ، سەرۆکێ هەرێما کوردستانێ ته‌ڤی تەکەزکرنا پشتگریا بەردەواما هەرێما کوردستانێ ژ بۆ پێڤاژۆیا دانوستاندنان راگهاند: “یەکرێزی و هەڤفێمکرنا ئالیێن کوردی پێدڤیتیەکا نهایە.»
سەرۆکێ هەرێما کوردستانێ ئاماژە ژی دا وێ یەکێ ژی کو، پاراستنا مافێن هەمی پێکهاتەیان و دابینکرنا پێکڤەژیانێ یەکانە رێیا بدەستخستنا تەناهی و پێشکەتنێ ل سووریەیێ یە.
شاندا ئه‌نه‌كه‌سێ ژی ژ ئالیێ خوە ڤە پەسنا رۆلا بەردەوام و بباندۆرا نێچیرڤان بارزانی کر، ژ بەر بزاڤێن وی ژ بۆ چارەسەرکرنا پرسا کوردان ل سووریەیێ و وێ پشتگریا کو هەرێما کوردستانێ ژێ رە دکە.
نیقاشکرنا رەوشا گشتی یا دەڤەرێ و چەند مژارێن دنێن ژ بۆ هەردو ئالیان بالکێش ژی تەوەرەکێ دنێ جڤینا وان یا ئیرۆ بوو.
