سەرۆک بارزانی: مەلایێ جزیری ستێرکەکا گەشە کو قەت ئاڤا نابە
سەرۆک مەسعوود بارزانی کو ل ناڤچەیا جزیرێ یا شرنەخێ بەشداری چارەمین سەمپۆزیووما ناڤدەولەتی یا “مەلایێ جزیری” بوو، د گۆتارا خوە دە بال کشاند سەر کووراھی و گرینگیا ھەلبەستێن جزیری و تێکلیا رووحی یا د ناڤبەرا وی و تەکیەیا بارزان دە.
سەرۆک بارزانی ئێرۆ 29ێ مژدارا 2025ێ ل جزیرێ بەشداری سەمپۆزیوومێ بوو و گۆتارەک پێشکێش کر و د دەستپێکا ئاخافتنا خوە دە سپاسیا ئامادەبوویان، ئامادەکارێن سەمپۆزیوومێ، وەزیرێ ناڤخوەیێ ترکیەیێ، والیێ شرنەخێ و سازیێن حکوومەتێ کر ژ بۆ پێشوازیا وان یا گەرم و گۆت: “ژ بۆ من رۆژەکا پر خوەشە کو ئیرۆ ل جزیرێ بەشداری چارەمین کۆنگرەیا مەلایێ جزیری دبم، کو ژ بۆ مە قوتبەکا پر مەزنە.”
د دەواما ئاخافتنا خوە دە، سەرۆک بارزانی رۆناھی خستە سەر پێگەھ و گرینگیا مەلایێ جزیری و وھا ئاخڤی: “مەلایێ جزیری ستێرکەکا گەشە کو قەت ئاڤا نابە و سەرکاروانێ ئەڤیندارێن رێیا حەقە. ھەلبەستێن جزیری قەت کەڤن نابن؛ ھەر دەم مرۆڤ وسا ھەست دکە کو نھا گوھ ل ھەلبەستێن وی دگرە. چقاس ب کووراھیێ بچی ناڤ ھەلبەستێن جزیری، ئەوقاس ژێ نێزیک دبی.”
سەرۆک بارزانی بەحسا وێ یەکێ ژی کر، ھەلبەستێن جزیری ل تەکیەیا بارزان جھەکی تایبەت ھەبوون: “ل تەکیەیا بارزان، ل حوزوورا مەولانا شێخ ئەحمەد بارزانی، ھەر تم ھەلبەستێن جزیری دھاتن خوەندن. ژ بۆ من دەرکەت ھۆلێ کو چ نێزیکبوونەکا رووحی د ناڤبەرا وان دە ھەیە، ژ بەر کو رێیا حەق و حەقیقەتێ یەکە.”
سەرۆک بارزانی ھەر وھا ئاماژە ب شارەزاییا مەلایێ جزیری یا د زمانێن جوودا و زانستێ دە کر و گۆت: “ل گۆری وان لێکۆلینەرێن کو ژ بۆ مە دەرخستنە ھۆلێ، دیارە جزیری د سالا 1570 دە ژ دایک بوویە و د سالا 1640ێ دە کۆچا داوی کریە؛ واتە 70 سالان ژیایە، لێ 70 سالێن تژی خێر و بەرەکەت، 70 سالێن تژی مەعریفەت و زانین.”
سەرۆک بارزانی وھا داوی ل ئاخافتنا خوە ئانی: “د ھەلبەستێن جزیری دە دیارە کو ئەو پر شارەزا بوویە و ل سەر زمانێن کوردی، ترکی، عەرەبی و فارسی سەردەست بوویە. دیارە ژ بۆ زانست و زانینێ پر گەریایە؛ یەک ژ وان جھێن کو بۆ مە دەرکەتیە ھۆلێ کو سەردانا وێ کریە، ئامێدی بوویە.”
