ئێریشا ل سەر کۆرمۆرێ: زیانا رۆژانە یا بەرھەمانینا گازێ ژ 7.4 ملیۆن دۆلاران زێدەترە

رەوانگەھا ئەکۆ ئیراقێ راگھاند، ژ بەر ئێریشا مووشەکی یا ل سەر کێلگەھا گازێ یا کۆرمۆرێ، زیانێن ئابۆری یێن رۆژانە گھیشتنە ئاستەکا مەزن. ل گۆری داخویانیێ، تەنێ د وارێ بەرھەمانینا گازێ دە رۆژانە زێدەتری 7.41 ملیۆن دۆلار زیان دگھە ھەرێما کوردستانێ و ئیراقێ.

رەوانگەھا ئەکۆ ئیراقێ ئیرۆ 29ێ مژدارێ د راپۆرەکا خوە دە ئامارێن ھوورگلییێن دەربارێ زیانێن راوەستاندنا کێلگەھا کۆرمۆرێ بەلاڤ کرن و دیار کر، بەری ئێریشێ، کێلگەھێ رۆژانە 530 ملیۆن پێ سێجا گازا سروشتی بەرھەم دئانی. ل گۆری بازارێ، نرخێ ھەر ملیۆنەک پێ سێجا گازا سروشتی نێزیکی 10 ھەزار دۆلارە.

ژ بلی ڤێ، ئامارێن دن یێن زیانان وھا نە:

– گازا مالان (LPG): کیلگەھ رۆژانە 1580 تۆن گازا LPG بەرھەم دئانی، کو نرخێ ھەر تۆنەکێ 500 دۆلارن.

– گازا کۆندەنسات: رۆژانە نێزیکی 22 ھەزار بەرمیل گازا کۆندەنسات دھات بەرھەمانین، کو نرخێ ھەر بەرمیلەکێ 60 دۆلارن.

د داخویانیێ دە ھات دەستنیشانکرن، ئەڤ ھەژمارێن ھاتنە دایین تەنێ زیانێن راستەراستێن بەرھەمانینا گازێ نە. ئەڤ تەخمین، زیانێن دن یێن وەکی کرێیا کۆمپانیایێن بەرھەمهێنەر، لێچوونێن ھێلێن ڤەگوھاستنێ و کێموکواسیێن د بەرھەمانینا ئەلەکتریکێ دە ل خوە ناگرن.

رەوانگەھێ بال کشاند سەر گرنگیا گازا سروشتی یا شل (LNG) یا کو بۆ بەرھەمانینا ئەلەکتریکێ تێ بکارئانین و دیار کر کو ھاوردەکرن و ڤەگوھاستنا وێ ژ بۆ ئیراق و ھەرێما کوردستانێ گەلەکی بھایە.

شەڤا 26ێ مژدارێ ئێریشەکا مووشەکی ل سەر عەمبارا گازا شل یا کێلگەھا کۆرمۆرێ ل ناڤچەیا چەمچەمالێ ھاتبوو کرن. ئێریشێ عەمبار ب تەمامی وێران کر و بوو سەدەما کێمبوونا بەربچاڤ یا ئەلەکتریکێ ل ھەرێما کوردستانێ، کو نھا بەرھەمانینا وێ داکەتیە 1500 میگاواتان.