ئه‌نه‌كه‌سه ژ شامێ دخوازە هەلوەستەکا زەلال ل سەر گۆتارێن کینێ وەربگرە
ئەنجوومەنا نشتیمانی یا کورد (ئه‌نه‌كه‌سه) داخواز ژ رێڤەبەریا ڤەگوهێزا شامێ کر کو، هەلوەستەکا زەلال ل سەر گۆتارێن کینێ وەربگرە، تەکەز ژی کر کو ئەڤ کریار زێدەتر سووریەیێ بەر ب پارڤەبوونێ ڤە دبن.
ئەنجوومەنا نشتیمانی یا کورد (ئه‌نه‌كه‌سه) د داخویانیەکێ دە راگهاند کو ئەو ب دلگرانی گۆتارێن تەشویقکرنێ یێن وان ئاهەنگێن کو سەرۆکێ سووریەیێ ئەحمەد شەرع بانگا وان کربوو دشۆپینن و گۆت: «ئەڤ کۆمبوون و پلاتفۆرمێن وان ژ بۆ بەلاڤکرنا کینێ و ئارمانجکرنا مللەتێ کورد و پێکهاتەیێن دن یێن سووریەیێ هاتن بکارئانین”.
ئه‌نه‌كه‌سێ دیار ژی کر کو “بلندبوونا زمانێ گەف و تەشویقکرنێ د وان کۆمبوونان دە مەترسیەکا یەکسەر ل سەر پێکڤەژیان و ئاشتیا جڤاکی دروست دکە، و ئەڤ کریار ژی زێدەتر بەرێ سووریەیێ ددن پارڤەبوونێ”.
ئەنجوومەنا نشتیمانی یا کورد تەکەز ژی کر کو، جەزاکرنا دەنگێن کو پشتگریا کینێ دکن و ئاشتیا جڤاکی تێک ددن گرینگە، هەروەسا بانگ ل رێڤەبەریا ڤەگوهێزا شامێ ژی کر کو هەلوەستەکا زەلال ل سەر ڤان گۆتاران وەربگرە و وان رەد بکە.
ئه‌نه‌كه‌سه دیار ژی کر کو، “رێیا ئارامیێ ب دانپێدانێ ب سووریەیا پرنەتەوە و ئۆل و پێکهاتە دەست پێ دکە و دڤێ دەستوورا وێ مافێن هەمیان، د ناڤ دە مللەتێ کورد د چارچۆڤەیا یەکبوونا سووریەیێ دە، گەرەنتی بکە”.
ئه‌نه‌كه‌سێ هەروەسا گۆت: “پەژراندنا بانگا شاندا کوردی یا هەڤپار ژ ئالیێ رێڤەبەریا شامێ ڤە ژ بۆ دیالۆگێ ل سەر پاشەرۆژا سووریەیێ و مافێ ملەتێ کورد رێ ل بەر تەڤایا بانگێن فتنێ دگرە”.
ئەنجوومەنا نشتیمانی یا کورد ل سووریەیێ د داویا داخویانیا خوە دە ژی تەکەز کر کو، ئەو پابەندی کارێ ژ بۆ سووریەیا نەناڤەندی، دەمۆکراتی و پرئالییە.
