پەکەکە: ھەکە ئۆجالان ئازاد نەکن، ئەم چ پێنگاڤێن دن بۆ ئاشتیێ ناهاڤێژین

پارتیا کارکەرێن کوردستانێ (پەکەکە) رادگھینە کو، ھەتا عەبدوللاھ ئۆجالان نەیێ ئازادکرن، ئەو چ پێنگاڤێن نوو ژ بۆ پێڤاژۆیا ئاشتیێ ناهاڤێژن.

فەرماندارێ پەکەکێ ئامەد مەلازگرت ژ بۆ ئاژانسا AFP راگھاند کو، ئەو چ پێنگاڤێن دن یێن کریارکی ژ بۆ بسەرخستنا پێڤاژۆیا ئاشتیێ ناهاڤێژن، ھەتا کو رێبەرێ تەڤگەرا وان عەبدوللاھ ئۆجالان ژ گرتیگەھا ئیمرالیێ نەیێ ئازادکرن.

ئامەد مەلازگرت ل سەر وان پێنگاڤێن کو پەکەکێ ژ بۆ بسەرخستنا پێڤاژۆیا ئاشتیێ ئاڤێتنە گۆت: “ھەمی پێنگاڤێن کو ژ ئالیێ پەکەکێ ڤە ژ بۆ پێڤاژۆیا ئاشتیێ ل ترکیەیێ ھاتنە ئاڤێتن ب پێشەنگیا ئۆجالان بوون، ژ بەر ڤێ یەکێ ژی بسەرخستنا پێڤاژۆیا ئاشتیێ گرێدایی ئازادکرنا وییە ژ بەر کو بێ ئازادکرنا وی چ پێنگاڤێن دن ژ بۆ ئاشتیێ ژ ئالیێ پەکەکێ ڤە نایێن هاڤێتن.”

ناڤبری د بەشەکا دنا ئاخافتنا خوە دە د وێ چاڤپێکەفتنا چاپەمەنیێ دە ل چیایێن قەندیلی گۆت کو، ئەو ل بەندا پێنگاڤێن کریارکییێن دەولەتا ترکیەیێ نە، کو دڤێت بێن ئاڤێتن.

وی فەرماندارێ پەکەکێ ھەروەسا گۆت: “ئازادکرنا سەرۆکێ گرتی یێ پەکەکێ کو ژ سالا 1999 ڤە د گرتیگەھا ئیمرالیێ دەیە، و ھەروەسا ب دەستووری و ب رەنگەکێ فەرمی دانپیدان ب گەلێ کورد د دەولەتا ترکیەیێ دە بێ کرن، دو داخوازێن سەرەکەیێن پەکەکێ نە د پێڤاژۆیا ئاشتیێ دە.”