رێڤەبەریا خوەسەر ب بۆنەیا دەرباسبوونا سالەکێ د سەر کۆچبەریا ب دارێ زۆرێ یا دویەمین یا خەلکێ عەفرین و شەھبایێ رە، داخویانیەک بەلاڤ کر. رێڤەبەریێ بانگ ل حکوومەتا دەمکی یا سووریەیێ و جڤاکا ناڤنەتەوەیی کر کو رێ ل بەر ڤەگەرا ئەولەیا کۆچبەران ڤەکن و داوی ل بنپێکرنان بینن.
د داخویانیێ دە بال ھات کشاندن، تەڤی گوھەرتنێن سیاسی یێن ل سووریەیێ و ھلوەشاندنا رەژیما بەعسێ، ھێ ژی دەستوور نەھاتیە دایین کو خەلکێ عەفرین، شەھبا، سەرێ کانیێ و گرێ سپی ڤەگەرن سەر مال و ملکێن خوە. رێڤەبەریێ ئەڤ رەوش وەکی “برینەکە ڤەکری” پێناسە کر و گۆت: “ڤەگەرا ئەولە، راکرنا داگیرکەریێ و راوەستاندنا بنپێکرنان شەرتێن بنگەھینن ژ بۆ دوبارە ئاڤاکرنا باوەریێ د ناڤبەرا پێکھاتەیێن سووریەیێ دە.”
رێڤەبەریا خوەسەر ھەر وھا نیگەرانیا خوە ل ھەمبەر زێدەبوونا گۆتارێن نەفرەتێ و ھاندانا توندیێ ئانی زمان. د داخویانیێ دە ھات دەستنیشانکرن کو ھنەک پلاتفۆرمێن راگھاندنێ و ئالیێن سیاسی ھەول ددن فتنەیێ د ناڤبەرا پێکھاتەیان دە دەرخن و ئەڤ یەک پرۆژەیا ئاڤاکرنا سووریەکە دەمۆکراتیک ئاستەنگ دکە.
ژ بۆ چارەسەریێ، رێڤەبەریێ داخواز ژ حکوومەتا دەمکی یا ل شامێ کر کو ھەلوەستەکە زەلال نیشان بدە و حەساب ژ کەسێن کو یەکرێزیا گەلێ سووریەیێ خرا دکن، بخوازە.
د داویێ دە، رێڤەبەریا خوەسەر تەکەز کر کو مژارا کۆچبەران د سەرێ رۆژەڤا وان دەیە و بێیی چارەسەرکرنا ڤێ پرسگرێکێ، ئاشتی و ئارامی ل سووریەیێ پێک نایێ. رێڤەبەریێ بانگ ل نەتەوەیێن یەکگرتی و دەولەتێن پەیوەندیدار کر کو زەختێ بکن، دا کو شەرت و مەرجێن ڤەگەرا ئەولە وەرن دابینکرن و دیالۆگا راستین یا سووری-سووری دەست پێ بکە.
