بولنت ئارنچ: یێن رەخنەیان دکن سەرۆک مەسعوود بارزانی ناس ناکن

سەرۆکێ بەرێ یێ پارلامەنتۆیا ترکیەیێ و یەک ژ دامەزرینەر و کەساتیێن ناڤدارێن ئاک پارتیێ بولنت ئارنچ د رۆنکرنەکا تێر و تەسەل دە پشتگریا خوە ب تەڤاھی ژ بۆ تەڤلیبوونا سەرۆک مەسعوود بارزانی د سەمپۆزیووما مەلایێ جزیری یا ل شرنەخێ دە ئانی زمان و پرانیا رەخنە و گێلەشۆکا کو ل سەر وێ سەردانێ چێ بوویە بێبنگەھ و خەلەت بناڤ کر.

پشتگریا ناڤەرۆکا وێ سەردانێ و گرینگیا کەسێن ئامادەبوویی

بولەنت ئارنچ تەڤلیبوونا سەرۆک بارزانی د وێ مەراسیمێ دە وەکی پێنگاڤەکا ئەرێنی بناڤ کر و پەسنێ وێ یەکێ دا کو، جڤینەکا وەسا ب ئامادەبوونا جیگرێ وەزیرێ ناڤخوە، والی، پارلامەنتەرێن نھا و یێن بەرێ یێن ئاک پارتیێ و زانایێن مەزن ھاتیە رێکخستن. ب باوەرا وی، لدارخستنا چالاکیەکا زانستی د وێ ئاستێ دە کارەکێ گەلەک دورست و پێدڤی بوو.

ئارنچ ل سەر وان گۆتگۆتک و نیقاشێن کو د ھوندرێ ترکیەیێ دە چێ بوونە ژی ئاماژە دا کو، پرانیا وان کەسێن کو رەخنە دکن یان داخویانیێن نەرینی ددن ئەو کەسن یێن کو مەسعوود بارزانی ناس ناکن و تێگھیشتنەکا خەلەت ھەیە.

ناڤبری ژ وان رە ب بیر خست کو بارزانی ژ سالا 1979 ڤە سەرۆکاتیا پارتیا دەمۆکراتا کوردستانێ (پەدەکێ) دکە، کو ل باشوورێ کوردستانێ خوەدیا پرانیا دەستھلاتێیە، و پێشتر ژی وەک سەرۆکێ ھەرێما کوردستانێ کار کریە، ژ بەر ڤێ یەکێ ژی سەرەدەریکرنا ب وی رە سەرەدەریەکا فەرمییە.

ئالیێن چاندی و دیرۆکی

ئارنچ د پارەکا دن یا نڤیسا خوە دە بەحسا گرینگیا وێ سەمپۆزیوومێ کریە و رۆن کریە کو، مەلایێ جزیری یەک ژ زانایێن مەزن یێن سەردەما عۆسمانییا 1567-1640 بوو.

ناڤبری ئاماژە ژی دا کو کەساتیێن وەکی مەلایێ جزیری، ئەحمەدێ خانی و فەقیێ تەیران ھەر چەند ب ئەسلێ خوە کورد بن ژی، لێ پارەکا نرخێن چاندی و ئۆلی یێن ھەڤپارێن دەڤەرێ نە، ژ بەر ڤێ یەکێ ژی ل گۆری باوەرا وی شاشفێمکرنا بیرانینا وان زانایان کارەکێ نەگونجایییە.

پەیامێن سیاسی و قۆناغا نوو

بولەنت ئارنچ ل وێ باوەرێیە کو، ئەڤ جڤین و جۆشا کو ل دەڤەرێ چێ کریە دێ ببە خالەکا وەرچەرخانێ یا گرینگ، ب تایبەتی ژی کو سەرۆک بارزانی د ئاخافتنا خوە دە پەیامەکا پر گرینگ ل سەر پێڤاژۆیا ئاشتیێ و رەوشا نھا پێشکێش کر، لەوما ژی ئەو رەخنەکرنا ل وێ جڤینێ ب خوە وەکی کارەکێ نەرەوا دبینە.