سەرۆک بارزانی لگەل جیگرێ وەزیرێ دەرڤەیێ ئەمریکایێ جڤیا
سەرۆک بارزانی لگەل جیگرێ وەزیرێ دەرڤەیێ ئەمریکایێ مایکل ریگەس و شاندەکا بالیۆزخانەیا ئەمریکایێ ل ئیراقێ جڤیا و پێ رە ھندەک مژارێن گرینگ نیقاش کرن.
بارەگەھا بارزانی پارڤە کریە کو، سەرۆک بارزانی ئیرۆ رۆژا چارشەم، 3ێ بەرچلەیا 2025ێ، ل ھەولێرێ لگەل جیگرێ وەزیرێ دەرڤەیێ ئەمریکایێ مایکل ریگەس و شاندەکا بالیۆزخانەیا ئەمریکایێ ل ئیراقێ جڤیا.
د جڤینێ دە، جیگرێ وەزیرێ دەرڤەیێ ئەمریکایێ کێفخوەشیا خوە ب سەردانا خوەیا ھەرێما کوردستانێ ئانی زمان و سەرکەفتنا پێڤاژۆیا ھلبژارتنێن پارلەمەنتۆیا ئیراقێ و سەرکەفتنا پارتیا دەمۆکراتا کوردستانێ ل سەرۆک بارزانی پیرۆز کر، ھەروەسا سپاسیا سەرۆک بارزانی کر ژ بەر رۆلا وی د پێشڤەبرنا ھەرێما کوردستانێ، شەرێ ل دژی تەرۆرێ و پاراستنا ئارامی و ئەولەھیا دەڤەرێ دە.
جیگرێ وەزیرێ دەرڤەیێ ئەمریکایێ ھەروەسا بەحسا بەردەوامی و بەرفرەھکرنا تێکلیێن د ناڤبەرا ئامەریکا و ھەرێما کوردستانێ دە د ھەمی واران دە کر و ڤەکرنا مەزنترین ئاڤاھیێ کۆنسولخانەیا ئەمریکایێ ل ھەولێرێ وەکی پێنگاڤەکا گرینگ وەسف کر.
مایکل ریگەس ھەروەسا راگھاند کو، ڤەکرنا مەزنترین کۆنسولخانەیا ئەمریکایێ ل ھەرێما کوردستانێ پەیامەکا ئەشکەرەیە کو ئامەریکا لگەل ھەرێما کوردستانێ یا بھێز، تەنا، ئارام و ئاڤەدانە. ھەروەسا گۆت کو، ئەولەھی و ئارامیا ھەرێما کوردستانێ ژ بۆ تەڤاھیا رۆژھلاتا ناڤین گرینگە و ئامەریکا ژی پشتگریێ ددە ھەرێما کوردستانێ.
ھەر د وێ جڤینێ دە، وەزیرێ دەرڤە یێ ئەمریکایێ ئێریشا ل سەر کۆرمۆرێ ب توندی شەرمەزار کر و داخوازا راوەستاندنا ڤان کریارێن وێرانکەر کر.
سەرۆک بارزانی ژی ھەر د وێ ھەڤدیتنێ دە ئیرۆ وەکی رۆژەکا دیرۆکی د تێکلیێن ئامەریکا و ھەرێما کوردستانێ دە وەسف کر کو مەزنترین کۆنسولخانەیا ئەمریکایێ ل ھەرێما کوردستانێ و ھەولێرێ ھاتیە ڤەکرن.
سەرۆک بارزانی ھەروەسا بەحسا دیرۆکا تەپەسەرکرنا گەلێ کوردستانێ ژ ئالیێ رەژیمێن ئیراقێ یێن ل پەی ھەڤ کر و راگھاند کو، ئەو دەرفەتا کو د سەرھلدانێ دە ژ بۆ گەلێ کوردستانێ چێ بوو و رۆلا کو ئەمریکایێ و ئەنجوومەنا ئەولەکاریێ د ئاڤاکرنا ھەرێمەکا دژەفرین دە ژ بۆ پاراستنا کوردستانێ دە ھەبوو، ھشت کو ھەرێما کوردستانێ ژ ڤێ دەرفەتێ فەیدەیی وەربگرە و پێڤاژۆیەکا دەمۆکراتیک ئاڤا بکە و ب رێیا ھلبژارتنان حکوومەت و پارلەمەنتۆ و دەزگەھێن ھەرێما کوردستانێ ئاڤا بکە.
سەرۆک بارزانی ھەروەسا بەحسا رۆلا گرینگا ئەمریکایێ د شەرێ ل دژی تەرۆریستێن داعشێ دە کر و گۆت کو، ھێزا پێشمەرگەیێن کوردستانێ د ڤی شەری دە گەلەک شەھید و قوربانی دانە، لێ ھەکە پشتگریا ئەمریکایێ نەبا، قوربانی دازێدەتر بووبان.
سەرۆک بارزانی ھەروەسا بال کشاند سەر رۆلا گرینگا ئەمریکایێ ل دەڤەرێ و رێز و سپاسیێن گەلێ کوردستانێ پێشکێشی ئەمریکایێ کرن و راگھاند کو، گەلێ کوردستانێ گەلەکێ دلسۆزە ل بەرانبەری وێ پشتگری و ئالیکاریا کو ئەمریکایێ پێشکێشی وان کریە و پشتگریا خوە ژ بۆ بەردەوامی و باشترکرنا تێکلیێن د ناڤبەرا ھەردو ئالیان دە د وارێن جودا جودا دە نیشان دایە.
