پەیاما سەرۆک بارزانی ل کۆنفەرانسا ئاشتیێ: د ئاشتیێ دە مرۆڤاھی سوودمەند دبە
سەرۆک مەسعوود بارزانی پەیامەکا تایبەت ئاراستەیی “کۆنفەرانسا ئاشتی و جڤاکا دەمۆکراتیکا ناڤنەتەوەیی” کر کو ل ستەنبۆلێ تێ لدارخستن. سەرۆک بارزانی د پەیاما خوە دە پشتگریا خوە یا تام ژ بۆ پێڤاژۆیا نوو یا ئاشتیێ ل ترکیێ و باکورێ کوردستانێ راگھاند.
ل ستەنبۆلێ ئیرۆ 6ێ بەرچلە کۆنفەرانسا کو ژ ئالیێ دەم پارتیێ ڤە ھاتیە ئۆرگانیزەکرن دەست پێ کر. پەیاما سەرۆک بارزانی ژ ئالیێ ئەنداما مەکتەبا سیاسی یا پارتیا دەمۆکراتا کوردستانێ (پەدەکێ) ئەمینە زیکری ڤە ھات خوەندن.
سەرۆک بارزانی د پەیاما خوە دە تەکەزی ل سەر گرنگیا ئاشتیێ کر و گۆت: “ھەر دەم دیالۆگ و لھەڤکرن ژ شەر و ئالۆزیان چێترە و د گۆتووبێژ و ئاشتیێ دە مرۆڤاھی بسەر دکەڤە. ھەر وھا بال کشاند سەر رەوشا ھەرێمێ و دیار کر کو ناڤچە د قۆناغەکا ھەستیار را دەرباس دبە، لەوما پێویستە ھەموو ئالی ژ شاشیێن بۆری دەرسان وەربگرن و ب نەفەسەکە نوو نێزیکی پێشھاتان ببن.
پەیاما سەرۆک بارزانی:
رێزدار ھەڤسەرۆکێن دەم پارتیێ،
رێزدار ئەندامێن کۆنفەرانسا ئاشتی و جڤاکا دەمۆکراتیکا ناڤنەتەوەیی،
ئامادەبوویێن ھێژا،
رۆژباش و سلاڤەکە گەرم ل وە ھەموویان بە.
د دەستپێکێ دە دخوازم سپاس و دەستخوەشیا خوە ئاراستەیی رێکخەرێن ڤێ کۆنفەرانسێ بکم. ئەز ھێڤیدارم کو ئەنجام و راسپاردەیێن کۆنفەرانسا ئاشتی و جڤاکا دەمۆکراتیکا ناڤنەتەوەیی، خزمەتا پێڤاژۆیا ئاشتی و چارەسەرکرنا پرسگرێکان و پێدڤیێن سەردەم و قۆناغا نوو بکە
رێزدارنۆ..
دەڤەرا مە و ھەموو جیھان د قۆناغەکا ھەستیار را دەرباس دبە. ھەموو نیشانە دیار دکن کو دەستپێکەکا نوو ھەیە، کو دکارە تژی ئاستەنگی بە، ئان ژی دکارە تژی دەرفەتێن نوو بە ژ بۆ ئارامی، ئەولەھی و ژیانەکا سەربلند و بروومەت و ئاشتیانە ژ بۆ گەلێن دەڤەرێ.
پێویستە ھەموو ئالی دەرسێ ژ شاشیێن سەردەمێن بۆری وەربگرن و ب بێھنەک نوو و نێرینەکا زەلال و تژی باوەری و ھێڤی ڤە، تەڤگەرێ لگەل ھەموو ئاستەنگی و پێشھاتێن نوو بکن.
ھەر دەم دیالۆگ و لھەڤکرن ژ شەر و ئالۆزیان چێترە و د گۆتووبێژ و ئاشتیێ دە مرۆڤاھی سوودمەند دبە.
رێزدارنۆ..
ئەز ب دل و جان دەستخوەشیێ ل حکوومەتا ترکیێ، برێز ئەردۆگان و برێز ئۆجالان و ھەموو وان رێزداران دکم کو دەرفەت ژ بۆ پرۆسەیا ئاشتی، چارەسەری و دانوستاندنان رەخساندن.
ژ ئالیێ خوە ڤە، ئەز پشتگریا ھەر ھەولدانەکێ دکم کو خزمەتا پرۆسەیا ئاشتیێ و بھێزبوونا برایەتی و پێکڤەژیانا گەلێن دەڤەرا مە بکە.
ھێڤیا سەرکەفتنێ ژ بۆ وە ھەموویان دخوازم، د خوەشی و خێرێ دە بمینن.
