پەیاما ئۆجالان د کۆنفەرانسا ئاشتیێ دە: دەم دەما سۆسیالیزما دەمۆکراتیک و ئاشتیێ یە

پارتیا وەکھەڤی و دەمۆکراسیێ یا گەلان (دەم پارتی)، ئیرۆ ل ستەنبۆلێ “کۆنفەرانسا ئاشتی و جڤاکا دەمۆکراتیکا ناڤنەتەوەیی” لدار خست. د کۆنفەرانسێ دە پەیاما رێبەرێ پەکەکێ عەبدوللاھ ئۆجالان ھات خوەندن کو تێ دە تەکەزی ل سەر “ژ نوو ڤە ئاڤاکرنا سۆسیالیزمێ ب رێیا ئاشتی و جڤاکا دەمۆکراتیک” کر.

کۆنفەرانس ئیرۆ 6ێ بەرچلە ل ستەنبۆلێ پێک ھات و دێ دو رۆژان بدۆمە. سیاسەتمەدار، یاساناس و چالاکڤانێن ناڤنەتەوەیی بەشداری کۆنفەرانسێ بوون دا کو پێڤاژۆیا ئاشتی و جڤاکا دەمۆکراتیکا پشتی بانگا 27ێ شوباتێ بنرخینن. ھەروھا وەیسی ئاکتاش پەیاما ئۆجالان د کۆنفەرانسێ دە خوەند.

پەیاما ئۆجالان: کۆمارا دەمۆکراتیک و جڤاکا دەمۆکراتیک

د پەیاما خوە یا ژ گراڤا ئیمرالیێ دە، عەبدوللاھ ئۆجالان دیار کر کو د بن شەرت و مەرجێن تەجریدا 26 سالان دە، ژ بۆ چارەسەریا پرسگرێکا کورد دانوستاندنێن لگە دەولەتێ ژ نوو ڤە دەست پێ کرنە. ئۆجالان دەستنیشان کر کو تێکۆشینا پەکەکێ یا 52 سالان یا ژ بۆ ھەبوون و روومەتێ قەدیایە و نھا قۆناغا “ئاڤاکرنێ” دەست پێ کریە.

ئۆجالان گۆت: “ئیرۆ دەم دەما ل سەر بنگەھا سۆسیالیزما دەمۆکراتیک مەشا بەر ب رزگاریا دەمۆکراتیک ڤەیە. ئەز باوەر دکم کو ئەم دێ ل شوونا دەولەتێ ب پەرسپەکتیفا کۆمارا دەمۆکراتیک، نەتەوەیا دەمۆکراتیک و پارادیگمایا جڤاکا دەمۆکراتیکا ژن-ئازادیخواز و ئەکۆلۆژیک ب سەر بکەڤن.”

“پێوەندیا لگەل دەولەتێ و ئەنتەگراسیۆنا دەمۆکراتیک”

ئۆجالان د پەیاما خوە دە بال کشاند سەر ئاوایێ تێکلیا لگەل دەولەتێ و رۆلا یاسایان. وی تێکلیا خوە وھا پێناسە کر:

“ئەز پێوەندیا خوە ل گەل دەولەتێ وەک دەمۆکراتیکبوونێ بناڤ دکم. دڤێت دەولەت ل سەر جڤاکێ نەبە، د ناڤبەرا دەولەت و جڤاکێ دە یاسا ھەبە. ب ستراتەژیا سیاسەتا دەمۆکراتیک ئەم دکارن ژ نوو ڤە جڤاکێ ئاڤا بکن. ب دەرخستنا یاسایان ژی بنگەھا ئاشتیا ماییندە ئاڤا دبە. یاسا دبە گارانتیا دەمۆکراتیک یا ناڤبەرا جڤاک و دەولەتێ و ب ڤێ ئاوایێ پێشیا توندیێ تێ گرتن.”

د بەردەوامیێ دە ئۆجالان ستراتەژیا خوە یا نوو ئاشکەرە کر و گۆت: “ژ بەر ڤێ من وەک ستراتەژیەکا نوو بەحسا ئەنتەگراسیۆنا دەمۆکراتیک کر. سێ پرەنسیبێن یاسایی یێن تەڤلیبوونا دەمۆکراتیک ھەنە: یاسایا ھەموەلاتیێ ئازاد، یاسایا ئاشتی و جڤاکا دەمۆکراتیک و یاسایێن ئازادیێ.”

گرنگیا دیالۆگێ ل رۆژھلاتا ناڤین

د داویا پەیامێ دە ئۆجالان بال کشاند سەر پێکھاتەیا تەڤلھەڤا ھەرێمێ و گۆت: “ل دەڤەرەکێ کو وەک رۆژھلاتا ناڤین کو گەلەک نەتەوە و ئۆل و مەزھەب د ناڤا ھەڤ دە نە، رێیا ھەری باش دیالۆگ و دانوستاندنا دەمۆکراتیکە، ب ڤان دێ گەلەک تشت بێنە بدەستخستن.”