ھاکان فیدان: دڤێت ھندەک ھێزێن د ناڤ ھەسەدێ دە بێن ھلوەشاندن
وەزیرێ دەرڤەیێ ترکیەیێ راگھاند: “ھەر چەند شام و ھەسەدە دکارن ل ھەڤ بکن ژی، لێ شەرتێ ترکیەیێ ئەوە کو دڤێت ئەو یەکینە و ھێزێن د ناڤ ھەسەدێ دە بێن ھلوەشاندن، یێن کو ل دژی ترکیەیێ شەر کریە و ل سەر ئەولەھیا ترکیەیێ گەفن.”
وەزیرێ دەرڤەیێ ترکیەیێ ھاکان فیدان ئیرۆ رۆژا شەمی، 6ێ بەرچلەیا 2025ێ، د چارچۆڤەیا تەڤلیبوونا د کۆربەندا دەوحەیێ دە بال کشاند سەر پرسا ھەڤگرتنا ھێزێن سووریەیا دەمۆکراتیک (ھەسەدێ) لگەل ئارتێشا سووریەیێ و گۆت: “د ڤێ دۆزێ دە دو مژارێن سەرەکی ھەنە؛ یا یەکێ ب گارانتیێن ئەولەھیێ یێن سووریەیێ ب خوە ڤە گرێدایییە، یا دویێ ژی ب وێ یەکێ ڤە گرێدایییە کا ترکیە دخوازە ژ بۆ چارەسەرکرنا گەفێن ئەولەھیێ یێن ل سەر خوە چ بکە.”
ھاکان فیدان رۆن ژی کر: “ئەنقەرەیێ پر ب ئەشکەرەیی ژ ھەسەدێ رە راگھاندیە کو ئەو چ دخوازە، و شامێ ژی ژ سالا بۆری ڤە هەمان تشت کریە.” ھەروەسا گۆت: “ئەم دزانین کو ھەسەدە بەشەک ژ پەکەکێ بوو و چەند پێکھاتە و ئالیێن وێ د ناڤ ھەسەدێ دە ل دژی ترکیەیێ شەر ژی کریە.”
ناڤبری تەکەز ژی کر کو چەند خال ژ بۆ وان گرینگن و گۆت: “ھەمی ھێز و یەکینەیێن کو ل دژی ئەولەھی و بەرژەوەندیێن ترکیەیێ نە، دڤێت بێن ھلوەشاندن.”
بەرپرسا تێکلیێن دەرڤە یا رێڤەبەریا خوەسەر یا رۆژئاڤایێ کوردستانێ ئیلھام ئەحمەد ژی ھەر ئیرۆ ب رێیا ڤیدیۆکۆنفەرانسێ تەڤلی کۆنفەرانسەکا ئاشتیێ ل ستەنبۆلێ بوو و راگھاند کو، پێڤاژۆیا ئاشتیێ یا د ناڤبەرا ترکیێ و پەکەکێ دە باندۆرەکا ئەرێنی ل سەر کوردێن سووریەیێ دکە و ئەو ژی دخوازن لگەل ئەنقەرەیێ دەست ب دیالۆگێ بکن.
فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ژی ل رۆژا 19ێ مژدارا 2025ێ د چارچۆڤەیا گەرا شەشێ یا کۆربەندا ئاشتی و ئەولەھیا رۆژھلاتا ناڤین (مێپس) دە گۆتارەک پێشکێش کر و د بەشەکا گۆتارا خوە دە بال کشاند سەر ئارێشەیێن وان لگەل ترکیەیێ و پێدڤی دیت کو، ترکیە ھەسەدێ وەکی مەترسی نەبینە و تەکەز ژی کر کو ئەو ل سەر ترکیەیێ نابن گەف.
