جەنگیز چاندار: سەرۆک بارزانی یەکرێزیا نەتەوەیی یا کوردان پاراست
سیاسەتمەدارێ ناڤدارێ باکورێ کوردستانێ و ئەندامێ پارلەمەنتۆیێ یێ پارتیا وەکھەڤی و دەمۆکراسیێ یا گەلان (دەم پارتی) جەنگیز چاندار نێرینێن خوە ل سەر پەیوەندی و باندۆرا دو کۆنفەرانسێن گرینگێن دەڤەرێ ئانین زمان و تەکەز کر: “پەیامێن سەرۆک بارزانی و سەرکرداتیا ھەرێما کوردستانێ جانێ یەکرێزیا نەتەوەیی ڤەژاند و سەلماند کو، کورد ل دەڤەرێ کاراکتەرێن سەرەکی و مۆتۆرا ئاشتیێ نە.”
تێکلیا د ناڤبەرا مێپسێ و کۆنفەرانسا ستەنبۆلێ دە
جەنگیز چاندار د دیدارەکە مەدیایی دە لگەل کوردستان 24ێ بال کشاند سەر کۆنفەرانسا ناڤنەتەوەیی یا ئاشتی و جڤاکا دەمۆکراتیکا کو ل ستەنبۆلێ ھاتیە لدارخستن. ھەروەسا ئەڤ کۆنفەرانس وەکی بەردەوامی و تەمامکەرا جڤینا مێپسێ، کو پێشتر ل دھۆکێ ھاتبوو لدارخستن، بناڤ کر. ل گۆری باوەریا چاندار، ئەو کۆنفەرانس بزاڤێن جدی و بباندۆرن ژ بۆ خێزکرنا نەخشەیا ئاشتی و ئارامیێ ل رۆژھلاتا ناڤین.
جڤینا دھۆکێ.. پلاتفۆرما کۆمبوونا جەمسەران
چاندار، کو ئەو ب خوە ژی تەڤلی جڤینا مێپسێ ل دھۆکێ بووبوو، ئەو بوویەر وەکی وێستگەھەکا ناڤنەتەوەیی یا پر بباندۆر، کو کەساتیێن پایەبلند و بریاردەرێن دەڤەرێ لێ جڤیان، بناڤ کر. ئاماژە ژی دا کو، د یەک ژ پانەلان دە وی پشتگری دا نێرینێن مەسروور بارزانی دەما کو وی تەکەز کر کو، جڤینا مێپس نە تەنێ جیھەک ژ بۆ ئاخافتنێیە، بەلکی پلاتفۆرمەک ژ بۆ بدەستخستنا دەستکەفتیێن کریارکییە ژی.
ل گۆری نەرینا چاندار، ئامادەبوونا کەساتیێن وەکی مەزلووم عەبدی و ئیلھام ئەحمەد ل دھۆکێ نیشانەکا ئەشکەرە یا گرینگیا وێ جڤینێ بوو و خوەستەکا ژ بۆ یەکرێزیا نەتەوەیی یا کوردان نیشان دا، ئەڤ ژی نیشان ددە کو کورد د ھەڤکێشەیێن سیاسییێن دەڤەرێ دە رۆلەکا بباندۆر دلیزن.
رۆلا سەرۆک بارزانی و پاراستنا یەکرێزیێ
پارلامەنتەرێ دەم پارتیێ د بەشەکا دن یا گۆتنێن خوە دە ژی رۆن کر کو، کۆنفەرانسا ستەنبۆلێ هەمان رێیا کو ل دھۆکێ دەست پێ کریە دایە بەر خوە. چاندار ب گرینگی بەحسا پەیاما سەرۆک بارزانی و سەرکرداتیا ھەرێما کوردستانێ د وێ کۆنفەرانسێ دە کر و راگھاند: “ئەو پەیام بوون ھێڤێنێ زندیکرنا یەکرێزیا نەتەوەیی یا کوردان.”
ئەنجامێن ھەردو کۆنفەرانسان، وەکی کو چاندار ئاماژە دایێ، گھیشت وێ باوەرێ کو کورد خوەدیێن سەنگ و گرانیا خوەیا تایبەتن و بێیی تەڤلیبوونا چالاکا کوردان وەکی کاراکتەرێن بھێز و سەرەکە تو پێڤاژۆیەکا ئاشتی و ئارامیێ ل رۆژھلاتا ناڤین ب سەر ناکەڤە.
