ھەسەدە ژ بۆ شامێ: درووشمێن کۆمێن چەکداران، بێھنا رەژیما بەعس ژێ تێ
ھێزێن سووریەیا دەمۆکراتیک (ھەسەدە) ب داخویانیەکا توند بەرتەک نیشانی درووشمێن ئیستیفزازی یێن کۆمێن چەکدارێن گرێدایی وەزارەتا بەرەڤانیێ یا حکوومەتا دەمکی یا سووریەیێ دا. ھەسەدێ دیار کر، ئەڤ ھەلوەست و گۆتنێن نەفرەتێ، دوبارەکرنا ھەمان ھشمەندیا رەژیما بەعسن کو گەلێ سووریەیێ ل دژی وێ سەری ھلدایە.
د داخویانیا ھەسەدێ دە ھاتە دەستنیشانکرن، پیرۆزباھیێن سالڤەگەرا رووخاندنا رەژیما بەعس، نیشانەیا خوەستەکا کوور یا گەلێن سووریەیێ یا ژ بۆ ئازادی و عەدالەتێیە. لێ بەلێ، د ڤێ دەمێ دە، ھندەک کۆمێن چەکدار یێن سەر ب حکوومەتا شامێ ڤە، درووشمێن دژمنانە ل دژی ھەسەدێ و پێکھاتەیێن باکور و رۆژھلاتێ سووریەیێ بەرز کرنە.
ھەسەدێ راگھاند، ئەڤ کریار نە تەنێ ھەیەجانەکا دەمکی یان بنپێکرنەکا تاکەکەسی نە، بەلکی پارچەیەک ژ کریارێن سیستەماتیکن کو ئارمانجا وان گورکرنا نەفرەتێ و تێکبرنا ئاشتیا ناڤخوەیییە. داخویانیێ وھا دۆماند: “ئەڤە ھەولدانەکا کو وەلاتی جارەکە دن بکشینە ناڤا چەرخا شەری یا کو سووریەییان بەردێلێن وێ یێن گران دانە.”
بەرپرسیاریا حکوومەتا شامێ
ھێزێن سووریەیا دەمۆکراتیک حکوومەتا دەمکی یا ل شامێ راستەراست بەرپرسیار دیت و گۆت: “ئەڤ کریار یان ستراتەژیەکا فەرمییە کو ئارمانج دکە ب رێیا نەفرەتێ ئەنجامان ب دەست بخە، یان ژی نیشانەیا بێچارەتیا حکوومەتێیە کو نکارە کۆمێن خوە کۆنترۆل بکە. د ھەر دو رەوشان دە ژی، پەیاما ‘بەردەوامیا ھشمەندیا بەعس’ گھشتیە.”
ھەسەدێ تەکەز کر کو ھەرێمێن وان دێ نەبن قادا گۆتنێن کینداریێ و ھەر ھەولدانەکا تێکبرنا ئارامیێ دێ ب بەرسڤەکا خورت وەرە پێشوازیکرن. د داویا داخویانیێ دە ھات گۆتن: “پێشەرۆژا سووریەیێ نە ل سەر پرۆڤۆکاسیۆن و درووشمێن ھیستریک، لێ ل سەر ھەڤکاری و رێزگرتنا ژ بۆ ئیرادەیا پێکھاتەیان تێ ئاڤاکرن. گەل و ھێزێن مە رێ نادن کو وەلات ڤەگەرە پاش.”
