گاڤەک ژ بۆ یەکرێزیا کوردی: پارتیا پێشڤەروو ڤەدگەرە ناڤا ئەنەکەسێ
ئەنجوومەنا نشتمانی یا کورد ل سووریەیێ (ئەنەکەسە) ب ئاوایەکی فەرمی بریارا ڤەگەرا پارتیا دەمۆکراتا پێشڤەروویا کورد ل سووریەیێ (پێشڤەروو) بۆ ناڤا رەفێن خوە ئەرێ کر. ئەڤ پێنگاڤ ژ ئالیێ رایەدارێن ئەنەکەسێ و چاڤدێران ڤە وەکی “خورتکرنا یەکرێزیا کوردی” تێ بناڤکرن.
د جڤینا خوەیا داوی دە، ئەنەکەسێ داخوازا پارتیا پێشڤەروویا ژ بۆ ڤەگەرا ناڤا ئەنجوومەنێ قەبوول کر. ئەندامێ دەستەیا سەرۆکاتیا ئەنەکەسێ سلێمان ئۆسۆ دیار کر، ئەڤ پارتی یەک ژ دامەزرێنەرێن ئەنەکەسێیە و ڤەگەرا وێ دێ ئەنجوومەنێ بھێزتر بکە.
سلێمان ئۆسۆ گۆت: “پارتیا پێشڤەروو یەک ژ وان پارتیان بوو کو د دامەزراندنا ئەنەکەسێ دە بەشدار بووبوو. بەریا پتری شەش مەھان داخوازا ڤەگەرێ کربوون و داخوازا وان ل جھ بوو. پشتی گۆتووبێژان ل سەر بەلگەیێن سیاسی و رێخستنی، مە ل ھەڤ کر و داخوازا وان ھات قەبوولکرن.”
پێشڤەروو: ئارمانجا مە خزمەتا دۆزا کوردە
ئەندامێ پۆلیتبورۆیا پارتیا پێشڤەروو فەنەر عەبدی، سەدەما ڤەگەرا خوە وھا شیرۆڤە کر: “پارتیا مە ئەنەکەسێ وەکی ھلگرا پرۆژەیا نەتەوەیی یا کوردی دبینە. ئارمانجا مە ژ ڤێ ڤەگەرێ، خزمەتکرنا داخوازی و ئارمانجێن گەلێ کوردە.”
عەبدی گۆت کو ئەڤ پێنگاڤ پشتی 5 مەھان ژ دانووستاندنان ھاتیە ئاڤێتن و ئەو دخوازن ئەنەکەسە رۆلا خوەیا راستەقینە و ئاکتیف بلیزە، وەکی چاوا د دەستپێکا دامەزراندنا خوە دە بوو.
چاڤدێرێن سیاسی ڤێ پێنگاڤێ وەکی گاڤەکا ئەرێنی و د جھ دە دبینن. ئەو باوەر دکن کو ڤەگەرا پارتیا پێشڤەروو دێ ببە سەدەما یەکخستنا ھەلوەستا کوردی و خزمەتا گەلێ کورد ل رۆژئاڤایێ کوردستانێ بکە.
پارتیا پێشڤەروو بەری 10 سالان، رۆژا 3ێ تیرمەھا 2015، د کۆنفەرانسەکا رۆژنامەڤانی دە ل باژارێ قامشلۆ بریارا ڤەکشینا خوە ژ ئەنجوومەنا نشتمانی یا کورد (ئەنەکەسێ) راگھاندبوو.
پشتی کۆچا داوی یا سەکرەتەرێ پێشڤەروو عەبدولحەمید دەرویش (24ێ جۆتمەھا 2019)، پارتی تووشی قەیرانەکا ناڤخوەیی ببوو و ژ بەر ناکۆکیان کۆنگرەیا وان چەند جاران ھاتبوو پاشخستن.
د ئەنجاما ڤان ناکۆکیان دە، ئەڤ پارتی د داویا سالا 2023 دە بوو دو باسک و دو کۆنگرەیێن جودا لدار خستن:
– یەکەم: د 20 جۆتمەھا 2023 دە، سەلاح دەرویش (برایێ حەمیدێ حەجی دەرویش) کۆنگرەیەک لدار خست و تێ دە وەکی سەکرەتەرێ پارتیێ ھاتبوو ھلبژارتن.
– دویەم: د 13ێ بەرچلەیا 2023 دە ژی، کۆنگرەیەکا دن ب ناڤێ ھەمان پارتیێ ل باژارێ عاموودێ ھات لدارخستن و تێ دە ئەحمەد بەرەکات وەکی سەکرەتەر ھاتبوو ھلبژارتن.
