ل باکورێ کوردستانێ ژ بەر بەرفێ رێیێن 172 گوندان ھاتن گرتن
پێلا نوو یا بەرف و بارانێ باندۆرەکا نەرینی ل ژیانا وەلاتیان ل باکورێ کوردستانێ کر. ل پارێزگەھێن جۆلەمێرگ و وانێ، ژ بەر بەرفا زێدە رێیێن ب دەھان گوندان ھاتن گرتن.
پێلا بارینا بەرف و بارانێ کو ئەڤ چەند رۆژن باکورێ کوردستانێ ل خوە گرتیە، ل ھەرێما سەرحەدێ دژوارتر بوویە. ل گەلەک دەڤەران باران ڤەگوھەری بەرفێ و بوو سەدەما گرتنا رێیان.
ل گۆری زانیاریان، ل پارێزگەھێن جۆلەمێرگ و وانێ، رێیێن 172 گوندان ژ بەر کۆمبوونا بەرفێ ھاتنە گرتن و ھاتووچوون راوەستیایە.
رێڤەبەریا تایبەت یا باژاران راگھاند، تیمێن وان ژ بۆ ڤەکرنا رێیێن گوندان دەست ب خەباتان کرنە و ھەولدانێن وان بەردەوامن دا کو رێ ل بەر وەلاتیان ڤەکن.
ل ئالیێ دن، ل پارێزگەھێن مووش، ئەرزرۆم، ئاگری و قەرسێ ژی بەرفەکە زێدە باریا و رێیێن دەھان گوندان ھاتبوون گرتن. لێ پشتی خەباتێن تیمێن پاقژکرنا بەرفێ، پرانیا وان رێیان ھاتنە ڤەکرن و ھاتووچوون ئاسایی بوویە.
ھەروھا ھات راگھاندن، ژ بەر بەرف و مژا زێدە، د ترافیکێ دە ئاستەنگیێن مەزن چێبوونە و ھشیاری ل شۆفێران ھاتیە دایین کو ب بالداری ئاژۆتنێ بکن.
