سەرۆک بارزانی پیرۆزباھیا گەلێ کوردستانێ و ئالیگرێن یانەیا زاخۆیێ دکە
ژ بەر بدەستخستنا ناسناڤێ باشترین ئالیگرێن وەرزشێ ل سەر ئاستا جیھانێ، سەرۆک بارزانی پیرۆزباھیێ ل گەلێ کوردستانێ، خەلکێ زاخۆیێ و ئالیگرێن یانەیا زاخۆیێ یا وەرزشێ دکە.
سەرۆک مەسعوود بارزانی ئیرۆ رۆژژا سێشەمبی، 16/12/2025ێ، ب رێیا تەلەفۆنێ پەیوەندی ب سەرپەرشتێ ئیدارەیا سەربخوەیا زاخۆیێ گوھدار شێخۆ کر.
سەرۆک بارزانی د وێ پەیوەندیێ دە پیرۆزباھی ل گەلێ کوردستان و زاخۆیێ و ئالیگرێن یانەیا زاخۆیێ یا وەرزشێ کر، ژ بەر بدەستخستنا ناسناڤێ باشترین ئالیگرێن وەرزشێ ل سەر ئاستا جیھانێ کو ژ ئالیێ یەکیتیا فوتبۆلێ یا جیھانێ (فیفایێ) ژ بۆ سالا 2025ێ ب ئالیگرێن یانەیا زاخۆیێ یا وەرزشێ ھات پێشکێشکرن.
سەرۆک بارزانی ئەڤ ناسناڤ وەکی بوویەرەکا دیرۆکی بناڤ کر و ژ بۆ لیستکڤانان و یانەیا زاخۆیێ یا وەرزشێ ژی سەرکەفتن خوەست.
بریارە کو نوونەرێ زاخۆیێ ئیشەڤ ب رێیا ئنتەرنەتێ تەڤلی مەراسیما فیفایێ ل دەوحەیا پایتەختا قەتەرێ ببە، و ژ ئالیێ سەرۆکێ فیفایێ ژی ڤە دێ لێ بێ پیرۆزکرن.
ژ بلی سەرۆک بارزانی، سەرۆکێ ھەرێما کوردستانێ نێچیرڤان بارزانی، سەرۆکێ حکوومەتا ھەرێما کوردستانێ مەسروور بارزانی و ھەژمارەکا دن یا کەساتیێن ناڤدار ژی ھەر ئیرۆ پیرۆزباھی ل ئالیگرێن یانەیا زاخۆیێ کر.
فیفایێ ئیرۆ رۆژا سێشەم، 16/12/2025ێ ل سەر مالپەرا خوەیا فەرمی راگھاند کو، ئالیگرێن یانەیا زاخۆیێ یا وەرزشێ ل سەر ئاستا جیھانێ ھەری زێدە دەنگ ب دەست خستنە و وەکی باشترین ئالیگرێن سالێ ھاتن ھلبژارتن.
