مهههپێ دهربارێ چارهنووسا گهریلایان سێ رێ دهستنیشان كرنه
پارتیا تهڤگهرا نهتهوهپهرست یا تركیهیێ، پلانهكه سێ خالی ژ بۆی پێڤاژۆیا ئاشتیێ پێشكێشی پارلامهنتۆیێ كر، بێچەککرنا ب تەڤاهی یا پهكهكێ، رادەستکرنا ئەندامێن رێخستنێ دیارترین خالێن وێ نه، ئۆجالان ژی ل سهر ڤێ یهكێ رازی بوویه.
ل گۆری رۆژنامهیا دهیلی سهباح یا نێزی حكوومهتا تركیهیێ، مهههپێ ڤێ داویێ ژ بۆ سەرکەفتنا پێڤاژۆیا «ترکیەیا بێ تەرۆر»، پلانەکە سێ خالی پێشکێشی پارلامەنتۆیێ کری یه، هوورگولیێن پلانێ د راپۆرەکە 120 رووپەلی دە جهـ دگرن.
د دەستپێکا ڤێ هەفتەیێ دە، مهههپێ راگهاند کو ئەوێ راپۆرهك ژ بۆی پێشڤهبرنا پێڤاژۆیا «تركیهیا بێ تهرۆر» پێشكێشی پارلامهنتۆیێ كریه.
راپۆرت پلانەکە سێ-قۆناغی دهەوینە:
بێچەککرنا ب تەڤاهی یا پهكهكێ.
رادەستکرنا ئەندامێن پهكهكێ.
ڤەژاندنا وان.
راپۆرت تەکەز دکە کو دڤێ هەمی ئەندامێن کۆمێ، تەڤی یێن ل دەرڤەیی وهلاتی و یێن گرێدایی پهكهكێ، بەشداری کامپانیایا بێچەککرنێ ببن.
ل گۆری راپۆرێن مەدیایێ، راپۆرت پێشنیار دکە کو جەزایێ ئەندامێن پهكهكێ یێن کو د تو سووجان دە نە، وەرە راکرن و تەسلیمی هێزێن ئەولەهیێ یێن ترکیەیێ وەرە کرن. ئەندامێن پهكهكێ یێن کو رازی دبن ل گهل رایەدارێن ترکیەیێ هەڤکاریێ بکن، دڤێ د بن شەرتەک یەک-سالی دە بن کو ل گۆری قانوونێن هەیی دکارە هەتا سێ سالان وەرە درێژ کرن.
راپۆر دبێژە دڤێ رایەدارێن ئەولەهیێ پێشی پشتراست ببن کو هەموو چەک هاتنە رادەستکرن ئان ژی هاتنە تونەکرن و ئەندامێن پهكهكێ دڤێ تەسلیم ببن.
راپۆرت هەر وها بەحسا “مافێ هێڤیێ” دکە کو باهچەلی پێشی ژ بۆ ئۆجالان، د بەردێلا بێچەکبوونێ دە، ئانی زمان. ئەو دەستنیشان دکە کو ئەڤ مافێ ناڤبۆری نایێ واتەیا بەردانا مەحکوومان و ئەو تەنێ نرخاندنەک ل سەر شەرت و مەرجێن گرتنا مەحکوومان بوو.
هەروهها ئەو دەستنیشان دکە کو کەسێن کو د تەرۆریزمێ دە بەشدارن و جەزایێ هەپسا هەتا هەتایێ یا گرانکری لێ هاتیە برین، نکارن ژ بەردانا شەرتی سوود وەربگرن.
مهههپێ ڤێ داویێ تەڤلی شاندەیەک ژ کۆمیتەیا هەڤگرتنا نەتەوەیی، براتی و دەمۆکراسیێ بوو، کو سەردانا ئۆجالان ل گرتیگەهێ کر. راپۆرت هوورگولیێن ل سەر ڤێ هەڤدیتنێ ڤەدهەوینە و دبێژە کو ئۆجالان پابەندبوونا خوە ب ئینیسیاتیفێ رە نیشان دایە و پشتراست کریە کو هلوەشاندنا پهكهكێ نە ب شەرتێ دایینا خوەسەریێ ئان شەرتێن وەکهەڤ ژ بۆ کۆما پهكهكێ بوو.
