دەزگەها خێرخوازی یا بارزانی ل عهفرینێ ئالیکاری گهاندن 400 مالباتێن ڤەگەریایی
دەزگەها خێرخوازی یا بارزانی ل عهفرینا رۆژئاڤایێ کوردستانێ کارێن خوە یێن مرۆڤی ددۆمینە و ڤێ جارێ ل ناحیا شیێ ئالیکاری گهاندن ئەو مالباتێن کو نوو ڤەگەریانە سەر مال و ملکێن خوە.
تیمێن دەزگەها خێرخوازی یا بارزانی د چارچۆڤەیا پێنگاڤێن خوەیێن داوی دە، ب هەڤکاریا رێخستنا “Khalsa Aid” ئالیکاریێن مرۆڤی ل سەر زێدەتری 400 مالباتێن کو نوو ڤەگەریانە ناڤەندا ناحیێ و گوندێن وێ، بەلاڤ کرن.
ئەنداما دەزگەها خێرخوازی یا بارزانی سیلڤانا عۆمەر ژ کوردستان 24ێ رە گۆت: “ئالیکاری ژ بۆ هەر مالباتەکێ دو بەشن؛ بەشا یەکەم سەلکەکە خوراک و زادە، بەشا دویەم ژی کەلوپەلێن پاقژی و پێویستیێن دنن. مە هەتا نها کاریبوو ئالیکاریا زێدەتری 650 مالباتان ل ڤێ دەڤەرێ بکن دا کو پشتەڤانیا ئیستقرارا وان بکن.”
ئەڤ ئالیکاری د دەمەکێ دە تێن کو روونشتڤانێن دەڤەرێ د رەوشەکە ئابۆری یا دژوار دە دژین و داهاتا وان کێمە. یەک ژ وەلاتیێن کو سوود ژ ئالیکاریێ وەرگرتیە، سپاسیا دهزگهها خێرخوازی یا بارزانی کر و گۆت: “ئەم سپاسیا دەزگەها بارزانی دکن کو کێماسی نەکرن. پێدڤیێن مە گەلەکن و رەوشا مادی یا خەلکێ ل ڤر د بن سفرێ دەیە. راستە مالبات ڤەدگەرن سەر ئاخا خوە، لێ راستیەکە تال ل پێشیا وانە، ئەگەر ئەڤ ئالیکاری نەبانا دێ رەوش هێ خرابتر با.”
دەزگەها خێرخوازیا بارزانی یەکەمین رێخستنا مرۆڤی بوو کو پشتی ئەردهەژا 6ێ سباتا 2023یان ژ بۆ هاوارا لێقەومیان دەرباسی عهفرینێ بوو. ژ وێ دەمێ ڤە، تیمێن دەزگەهێ ل هەرێمێ مانە و بەردەوام خزمەتا خەلکێ عهفرینێ دکن.
