ھەسەدە پێشوازی ل ئێریشێن ئامەریکایێ دکە: داعش ھین ژی گەفەکە مەزنە
فەرمانداریا گشتی یا ھێزێن سووریەیا دەمۆکراتیک (ھەسەدێ) پێشوازی ل ئێریشێن داوی یێن ئامەریکایێ یێن ل دژی ڤەشارتگەھێن داعشێ کر و ھشیاری دا کو نابە شەرێ ل دژی تەرۆرێ وەرە راوەستاندن یان کێمکرن.
پشتی کو ئامەریکایێ ئۆپەراسیۆنەکە بەرفرەھ ل دژی داعشێ ل سووریەیێ پێک ئانی، فەرمانداریا گشتی یا ھەسەدێ داخویانیەک بەلاڤ کر و تێ دە سپاسیا ھێزێن ئامەریکایێ و ھەڤپەیمانیا ناڤدەولەتی کر کو د دەمژمێرێن داوی دە بنەسازیا داعشێ کرنە ئارمانج.
د داخویانیێ دە ھات گۆتن: “پشتەڤانیا ئاسیمانی فاکتۆرەکە گرینگە دا کو رێ ل بەر رێخستنا داعشێ وەرە گرتن کو شانەیێن خوە ژ نوو ڤە کۆم بکە یان چالاکیێن خراب پێک بینە.”
فەرمانداریا ھەسەدێ بال کشاند سەر مەترسیا بەردەواما ڤێ رێخستنا تەرۆرست و گۆت: “ئەزموونان ئیسبات کر کو نابە شەرێ ل دژی تەرۆرێ وەرە راوەستاندن. داعش ھین گەفەکە راستەراست ل سەر ئەولەھی و ئارامیا ھەرێمێ چێدکە و ھەول ددە ژ ھەر ڤالاھی و سستبوونا ئەولەھیێ سوود وەربگرە.”
ل گۆری داخویانیێ، ھەسەدێ ئیسال ب ھەڤکاریا ھەڤپەیمانیا ناڤدەولەتی (چ ب پشتەڤانیا ئاسمانی چ ب ئاگاھیێن ئیستخباراتی)، ب سەدان ئۆپەراسیۆن ل دژی شانەیێن ڤەشارتی پێک ئانینە. د ئەنجامێ دە گەلەک بەرپرسێن خەتەرناک ھاتنە گرتن و کۆمێن وان یێن چالاک ژ ھەڤ ھاتنە خستن.
ھەسەدێ د داویێ دە تەکەز کر کو رێیا یەکانەیا ژھۆلێ راکرنا گەفان، ھەڤکاری و پەڤگوھەرتنا ئاگاھیانە. ھەروھا ھەسەدێ سۆز دا کو دێ شەرێ ل دژی داعشێ و پاراستنا سڤیلان بدۆمینە و لگەل ھەموو ئالیێن کو ل دژی تەرۆرێ شەر دکن ھەڤکاریێ بکە.
ئەڤ داخویانیا ھەسەدێ پشتی وێ تێ، فەرمانداریا ناڤەندی یا ئارتێشا ئامەریکایێ (سێنتکۆم) شەڤا بۆری ب بەشداریا فرۆکەیێن شەر، ھەلیکۆپتەرێن ئێریشبەر و تۆپبارانێ ئۆپەراسیۆنا “چاڤێ باز” ھاتیە ئەنجامدان. د ئۆپەراسیۆنێ دە بنەسازی و ئەمبارێن چەکان یێن داعشێ کرنە ئارمانج.
