شاندا ئیمرالیێ یا دەم پارتیێ ئیرۆ لگەل ئاک پارتیێ دجڤە

 شاندا ئیمرالیێ یا پارتیا وەکھەڤی و دەمۆکراسیێیا گەلان (دەم پارتی)، ژ بۆ گۆتووبێژکرنا قۆناغا نوو یا پرۆسەیا ئاشتیێ، ئیرۆ ل پارلامەنتۆیا ترکیەیێ دەست ب گەرا ھەڤدیتنان دکە.

ل گۆری بەرنامەیێ، شاندا دەم پارتیێ دێ ئیرۆ 20ێ بەرچلەیێ ل دەمژمێر 14:00، ل پارلامەنتۆیا ترکیەیێ لگەل فراکسیۆنا پارتیا داد و گەشەپێدانێ (ئاک پارتی) بجڤە.

تێ چاڤەرێکرن کو دو دەمژمێران پشتی ڤێ جڤینێ (دەمژمێر 16:00)، ھەمان شاند لگەل بەرپرسێن پارتیا کارکەرێن ترکیەیێ (TIP) ژی بجڤە.

مژارا سەرەکەیا ڤان ھەڤدیتنان، نرخاندنا پێنگاڤێن پرۆسەیا نوو یا ئاشتیێ ل ترکیە و باکورێ کوردستانێ و پێشھاتێن داوی یێن ڤێ مژارێیە.

ھەروھا ھات راگھاندن، شاندا دەم پارتیێ دێ رۆژا دوشەمێ 22ێ بەرچلەیێ ژی لگەل پارتیا گەل یا کۆماری (جەهەپێ) بجڤە.

شاندا ئیمرالیێ کو ژ پەروین بولدان، میتحەد سانجار و فاییق ئۆزگور ئەرۆل پێک تێ و وەکی ئاکتۆرێ سەرەکە و مۆتۆرا پرۆسەیێ تێ پێناسەکرن، ئەڤ چەند رۆژن ل ئەنقەرەیێ ھەڤدیتنێن گرینگ پێک تینە. شاندێ د 12ێ کانوونێ دە لگەل سەرۆکێ گشتی یێ دەڤایێ عەلی باباجان و د 16ێ کانوونێ دە ژی لگەل سەرۆکێ گشتی یێ پارتیا پێشەرۆژێ ئەحمەد داودئۆغلو جڤیابوو.

شاندێ د ڤێ ھەیاما داوی دە چەندین جاران سەردانا گرتیگەھا ئیمرالیێ کریە و پشتی ھەڤدیتنێن لگەل رێبەرێ پەکەکێ عەبدوللاھ ئۆجالان، پەیامێن وی گھاندنە دەرڤە.