ئێریشا ل سەر لەیلا زانا ئێریشا ل سەر ژنێ نینە، ئێریشا ل سەر مللەتەک بندەستە
د یاریا فوتبۆلێ یا د 17ێ کانوونێ دە د ناڤبەرا سۆماسپۆر و بورساسپۆرێ دە هاتیە ئەنجامدایین، ھنەک ئالیگرێن بورسا سپۆرێ ل ھەمبەری سیاسەتمەدارا کورد لەیلا زانا خانمێ “درووشمێن” تژی بێرێزی و سڤکاتی بەرز کرن، پشترە دوهی 19ێ کانوونێ جارەکە دن د یاریا ساریەر و ئانکاراسپۆرێ دە ئالیگرێن ئانکاراسپۆرێ ئەڤ درووشمێن نە ل رێزێ ل دژی لەیلا زانا دوبارە کرن.
تشتا ئەجێب ئەڤە کو د رۆژا یەکەم دە ب ت ئاوا چاپەمەنیا پەکەکێ ل سەر ڤێ مژارێ نەسەکنی و ت نووچەیەک د ڤێ دەربارێ دە نەوەشاند، پشتی کو ئەڤ یەک د سۆسیال مەدیایێ دە بوویە رۆژەڤ و کوردان نەرازیبوونا خوە نیشان دای ژ نوو دە چاپەمەنیا پەکەکێ کەت تەڤگەرێ، لێ خوەزی هەر ب بێدەنگی مابا و ت تشتەک د ڤێ دەربارێ دە پارڤە نەکربا، ژ بەر کو پەکەکە دخوازە ئێریشا ل سەر لەیلا زانایێ چێبووی ب تەنێ وەکە ئیریشا ل سەر ژنێ هاتیە کرن نیشان بدە، لێ د راستیا خوە دە ئیریشا چێبووی ئێریشا ل سەر تەڤاهیا کوردان بوویە.
ژ بەر کو تشتێ کو ل ستادیوما فوتبۆلێ ل دژی لەیلا زانا قەومی نە “بێ کلتورییا تەماشەڤانان” نەژی “ھەیەجانا دەمکی” بوو؛ بەلکو ئەو دەنگێ فەرمی یێ فاشیزما ترک بوو کو ژ وەرزیشێ دەرکەت. ستادیوم تەنێ جھێ روودانا بوویەرێ یە، تاوانا راستین د وێ زیھنیەتێ دەیە کو نەفرەتا ل دژی کوردان، ژنان و ئازادیێ رەوا دکە و ب سەربلندی دقیرە.
ئێریشا ل سەر لەیلا زانا نە ئێریشا ل سەر ژنەکێ یان ناڤەکییە؛ ئەو ئێریشەک ل سەر دیرۆکا بەرخوەدانێ، زمانەکێ بندەستکری و لاشێ ژنەکێ یە کو ئەو وێرەکی هەبوویە سەرێ خوە ل هەمبەر فاشیزما ترکان نەتەوینە. ئەڤ نەفرەت نە تەسادوفییە؛ ئەو بەرھەما ب سالان ئینکارکرن، زیندانکرن، روورەشکرن و دەرەوێن دەولەتێ یە. یێن کو ئیرۆ ڤان درووشمان دقیرن دوھ گرتیگەھ ئاڤا دکرن و سبە دیسا دێ دەست ب کوشتنێن بکەر نەدیار کن.
بێدەنگیا سازیان، داخویانیێن بێخەم و ژەستێن ئەخلاقی ھەڤکاریەکا ئەشکەرە یا ڤی تاوانێ نە. نەفرەتا کو بێی سزا دمینە زێدە دبە.
ژ بەر کو ھین لەیلا زانا ساخە، ژ بەر کو ئەو ھین سەمبۆلەکە، ژ بەر کو ئەو ھین نەھاتیە تێکبرن، ھاتە ئارمانجکرن.
ئەڤ نە تەنێ سڤکاتییا ل دژی لەیلا زانایێ بوو؛ ئەڤ راگەهاندنا شەرەکی ل دژی روومەتا مرۆڤاھیێ بوو و ھەر کەسێ کو دخوازە وێ نۆرمالیزە بکە شریکە.
ئەڤ ئێریش، ئیرشا ل دژی لەیلا زانایێ ب تەنێ نەبوو، ئێریشا ل دژی ژنێ ژی نەبوو وەکە پەکەکە دبێژە، بەلکو ئەڤ ئێریش، ئێریشکرنە سەر کوردان ب تەڤاهی بوو د شەخسێ لەیلا زانایێ دە.
