شاندەیا ئیمرالیێ: سەردان و ھەڤدیتنێن مە دێ بەردەوام بن
شاندا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی)، ژ بۆ گۆتووبێژکرنا قۆناغا نوو یا پرۆسەیا ئاشتیێ، ئیرۆ ل پارلامەنتۆیا ترکیەیێ سەردانا شاندەیا ئاکەپێ کر و ژ ئالیێ سەرۆکێ کۆما ئاکەپێ عەبدوللاھ گولەر، بەردەڤکێ ئاکەپێ عۆمەر چەلیک، سەرۆکوەکیلێ سەرۆکێ گشتی یێ ئاکەپێ ئەفکان ئالا ڤە ھاتە پێشوازیکرن.
هەڤدیتنا کو دەمژمێر و نیڤان بەردەوام بووی ب ئاوایەکی گرتی و دوور ژ چاپەمەنیێ هات لدارخستن.
د داخویانیەکێ دە پشتی هەڤدیتنێ سەرۆکێ کۆما ئاکەپێ عەبدوللاھ گولەر ئاخڤی و دیار کر کو ئەو سپاسیا شاندەیا دەم پارتیێ دکن و گۆت: “ھەموو پارتیێن سیاسی راپۆرێن خوە رادەستی کۆمیسیۆنا مەجلسێ کرنە. ھەری داوی مە ژی راپۆرا خوە تەسلیم کر. ل سەر ڤێ یەکێ ژی مە نرخاندنێن بەرفرەھ کرن.”
هەر وەها پەروین بولدان ژی ئاخڤی و سپاسیا شاندەیا ئاکەپێ کر. بولدان ئانی زمان کو وان ل سەر مەرحەلەیا پێڤاژۆ گەھشتیێ ھەڤدیتن پێک ئانیە و وھا گۆت: “مە پەشنیارێن خوە ژ وان رە کرن. شاندەیا ئاکەپێ ژی پێشنیارێن خوە ئانین زمان. مە گرینگیا ڤێ یەکێ دیار کر؛ ئاشتی بێ یاسا نابە. ژ بۆ وێ ژی مەرحەلەیا ئەم گھشتنێ پێویستیا وێ ب زەمینا یاسایی ھەیە. ئەم د مەرحەلەیەکا نوو دە نە. سەردان و ھەڤدیتنێن مە دێ بەردەوام بن. ئەم دێ ھەر تم د ناڤا دیالۆگێ دە بن.”
میتحەد سانجار ژی دیار کر کو سەردانێن شاندەیێ بۆ پارتیێن سیاسی دێ بەردەوام بن. هەر وەها دیار کر کو ئەو دێ لگەل وەزیرێ دادێ و سەرۆکێ مەجلسێ ھەڤدیتنێ بکن. پشترە ژی دێ لگەل ئەردۆگان ژی ھەڤدیتنێ بکن.
