پارلامنتەرەکی ئاکەپێ رەخنە ل گۆتنێن فیدان یێن دەربارێ سووریێ کرن

پارلامەنتەرێ ئاکەپێ یێ دییاربەکرێ غالب ئەنسارۆغلو گۆت کو، داخویانیێن وەزیرێ دەرڤە ھاکان فیدان یێن دەربارێ سیاسەتا سووریەیێ دە توند بوون. وی ئیدیعا کر کو گۆتنێن فیدان ل گۆری ئیرادەیا سەرۆکێ ئاکەپێ و سەرۆکۆمار رەجەب تەییب ئەردۆگان نینن.

پارلامەنتەرێ ئاکەپێ یێ دییاربەکرێ غالب ئەنسارۆغلو د ئاخافتنا خوەیا ل سەر روداوو تیڤی دە ل سەر پێڤاژۆیا ئاشتیێ و خەباتا کۆمیسیۆنێن پارلەمەنتۆیێ داخویانیێن رەخنەگر دان. ئەنسارۆغلو رەخنە ل داخویانیێن وەزیرێ دەرڤە ھاکان فیدان یێن دەربارێ سیاسەتا سووریەیێ دە گرت و ئیدیعا کر کو د ڤان داخویانیان دە زمانەکی توند ھەیە.

ئەنسارۆغلو د دەربارێ ئیدیعایێن ناکۆک یێن د ناڤ حکوومەتێ دە یێن دەربارێ سیاسەتا سووریەیێ یان پێڤاژۆیێ دە تەکەز کر کو د سیستەما سەرۆکاتیێ دە، بریارا داوی یا سەرۆککۆمار ئەردۆگانە.

ئەنسارۆغلو دەما کو رایا خوە یا شەخسی دیار کر کو ھندەک داخویانیێن توند یێن وەزیرێ دەرڤە ھاکان فیدان یێن دەربارێ سووریەیێ دە ب تەڤاھی ل گۆری روحێ دەمێ نینن، تەکەز کر کو چێکەرێ سیاسەتێ یێ راستین سەرۆککۆمار ئەردۆگانە و ژ یا وی زێدەتر ئیرادە تونەیە.

ئەنسارۆغلو گۆت، “چ ئیرادە ل سەر ئیرادەیا سەرۆککۆمار تونە. ھەر چەند ھندەک داخویانی دبە کو ب تەڤاھی روحێ دەمێ نیشان نەدن ژی، گۆتنا داوی یا سەرۆککۆمارە.”

فیدان دەربارێ رەوش و پێڤاژۆیا ئەنتەگراسیۆنێ ھەسەدێ نرخاندن کر و گۆت، “بێ گومان، ئەم ژ لەزا پێڤاژۆیێ نە رازینە. ئەم، سوورییەیی و ھندەک ھەڤکارێن دن -ئەز ناخوازم ناڤێ وان بدم- ب ھەڤ رە دفکرن کو ھەسەدە ھەول ددە بێتر دەمێ درێژ بکە. ئەز دفکرم کو ئەو ژ بۆ خوە ل ھێڤیا دەرفەتێن دنن، دبە کو د شکلێ کریزەکا دن یا ھەرێمی دە، یان ژی دبە کو ژ بەر پۆلیتیکایێن بەرفرەھکەر یێن ئیسرایلێ یێن ل ھەمبەر سووریەیێ و دەڤەرێن دن. ژ بەر ڤێ یەکێ، ئەز دفکرم کو تشتێ باش ئەوە کو ھەڤکارێن مەیێن ئامەریکی پر باش دزانن کو ئەڤ پێڤاژۆ دڤێت وەرە تەمام کرن ژ بەر کو ئەو ژ بۆ یەکیتییا وەلات پر گرینگە.”