ئیران دێ جوانەکی ئورمیەیی سێداره‌ ده‌ت

دادگەها بلند یا ئیرانێ، بریارا دادگەها شۆرەشێ یا ئورمیەیێ یا ژ بۆ سێداره‌دانا جوانێ كورد «میهراب عەبدوڵاهزادە» پەسەند کر.

میهراب عەبدوڵاهزادە جوانەکێ کوردێ 27 سالی یە و ژ ئورمیەیێ یە کو د خوەنیشاندانێن سالا 2022یان دە هاتبوو گرتن.

رێخستنێن مافێن مرۆڤانێن رۆژهلاتێ کوردستانێ بەلاڤ کر کو جەزایێ سێداره‌دانا میهراب عەبدوڵاهزادە، ژ ئالیێ شاخا 9 مین یا دادگەها بلندا ئیرانێ ڤە هاتیە پشتراستکرن.

ل گۆری زانیاریان، میهراب عەبدوڵاهزادە یێ کو نها د گرتیگەها ناڤەندی یا ئورمیەیێ دا یە، رۆژا پێنجشەمێ ژ بریارێ هاتیە ئاگاهدارکرن.

میهراب ئەبدوڵاهزادە پاییزا سالا 2022ێ هاتبوو گرتن.

هاڤینا سالا بۆری ژ ئالیێ شاخا یەکەم یا دادگەها شۆرەشێ یا ئورمیەیێ ڤە جەزایێ سێداره‌دانێ لێ هاتبوو برین.

تۆهمەتا وی (کەسێ کو ژ بۆ رووخاندنا کۆمارا ئیسلامی یا ئیرانێ هەول ددە)یە، واتە ئەندامتیا وان کۆمێن کو ل دژی حکوومەتا ئیسلامی چالاکیێن ب چەکان دکن.

میهراب عەبدوڵاهزادە ب کوشتنا ئەندامەکی هێزێن بەسیجێ تێ تۆهمەتبارکرن کو هێزەکە سەر ب سوپایا پاسداران یا ئیرانێ ڤەیە.