شاندا ئیمرالیێ سەردانێن خوە ددۆمینە: ئیرۆ لگەل جەهەپێ و ئەمەئەپێ دجڤە

شاندا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی)، د چارچۆڤەیا پرۆسەیا نوویا ئاشتیێ دە، ئیرۆ ل ئەنقەرەیێ لگەل سەرۆکێن جەهەپێ و ئەمەئەپێ دجڤە. سبە ژی دێ لگەل سەرۆکێ پارلامەنتۆ و وەزیرێ دادێ ھەڤدیتنان پێک بینە.

شاندا دەم پارتیێ کو ژ پەروین بولدان، میتحەد سانجار و پارێزەر ئۆزگور ئەرۆل پێک تێ، گەرا خوەیا ھەڤدیتنان یا لگەل ئالیێن سیاسی و حکوومی ددۆمینە.

بەرنامەیا ئیرۆ

ل گۆری پلانسازیێ، شاند ئیرۆ دوشەمبێ 22ێ بەرچلەیێ، دەمژمێر 12:00ێ نیڤرۆ لگەل سەرۆکێ گشتی یێ پارتیا گەل یا کۆماری (جەهەپێ) ئۆزگور ئۆزەل دجڤە.

ھەر وھا بریارە کو دەمژمێر 16:00 ژی لگەل سەرۆکێ پارتیا کەدێ (ئەمەئەپێ) سەیید ئاسلان بجڤن.

بەرنامەیا سبە

تێ چاڤەرێکرن کو شاند سبە سێشەمبێ ھەڤدیتنێن خوە ب ئاستەکە بلندتر بدۆمینە. بریارە ئەندامێن شاندێ لگەل سەرۆکێ پارلامەنتۆیا ترکیەیێ نومان کورتولموش و وەزیرێ دادێ یلماز تونچ بجڤن.

ئەنداما شاندێ پەروین بولدان پێشتر دیار کربوو، ئەو پشتی رادەستکرنا راپۆرتان، دەرباسی قۆناغەکە نوو بوونە و ئارمانجا وان یا سەرەکە دەرخستنا یاسایێن ئاشتیێ یە. شاندێ راگھاندیە کو د قۆناغا داوی یا ھەڤدیتنان دە، ئەو پلان دکن لگەل سەرۆککۆمارێ ترکیەیێ رەجەب تەییب ئەردۆگان ژی بجڤن.

شاندا ئیمرالیێ بەریا نھا لگەل سەرۆکێ دەڤایێ عەلی باباجان، سەرۆکێ پارتیا پێشەرۆژێ ئەحمەد داودئۆغلو و فراکسیۆنا ئاک پارتیێ جڤیابوو.