ژ بۆ پشتەڤانیا لەیلا زانایێ، ئامەدسپۆر دەریێن خوە ژ بۆ ژنان ڤەدکە

یانەیا ئامەدسپۆرێ راگھاند، د لیستکا ل ھەمبەر ئگدرسپۆرێ دە، وەکی بەرسڤەک ل دژی سڤکاتیێن کو ل دژی سیاسەتمەدار لەیلا زانایێ کرن، دێ کەتنا یاریگەھێ ژ بۆ ژنان بێپارە بە.

پشتی کو د لیستکا ناڤبەرا بورساسپۆر و سۆماسپۆرێ یا 16ێ بەرچلەیێ دە، کۆمەک ئالیگرێن نژادپەرەست ئێریشا دەڤکی و سڤکاتی ل سیاسەتمەدارا کورد لەیلا زانایێ کربوون، بەرتەکێن توند بەردەوامن. ئامەدسپۆرێ ژی ب پێنگاڤەکا واتادار ھەلوەستا خوە نیشان دا.

جیگرا سەرۆکێ ئامەدسپۆرێ شەیدا ئارسلانتاش د داخویانیەکێ دە ژ بۆ ئاژانسا مەزۆپۆتامیایێ ئاخڤی و گۆت: “ب زێدەبوونا ھەژمارا ژنان یا ل یاریگەھێ، ئەم دێ باشترین بەرسڤێ بدن وان ئێریشان.”

ئارسلانتاش تەکەز کر، ئێریشێن نژادپەرەست و زایەندپەرەست یێن ل دژی لەیلا زانایێ، د ھەمان دەمێ دە ئێریشن ل سەر ناسنامەیا ژنان.

رایەدارا ئامەدسپۆرێ دیار کر، ئەو وەکی یانە ب سالانە تێدکۆشن دا کو یاریگەھ و چالاکیێن وەرزیشی نەبن ئامرازێ گۆتارێن نژادپەرەست، جوداخواز و زایەندپەرەست.

ب ڤێ بریارێ، تێ چاڤەرێکرن کو د لیستکا داھاتوویا ئامەدسپۆرێ دە ھەژمارەکا مەزن یا ژنان ل ستادیوومێ ئامادە بن و پەیاما پشتەڤانیێ بدن.