بنگەھا لالشێ: گۆتارا سەرۆک بارزانی ل سەر چیایێ شنگالێ بۆ ئێزدیان ڤەگەرا ھێڤیان بوو

بنگەھا لالشێ یا رەوشەنبیری د راگھاندنەکێ دە داستانا دیرۆکی یا 23/12/2014ێ  ب بیر ئانی، دەما کو سەرۆک مەسعوود بارزانی ل سەرێ چیایێ شنگالێ گۆتارا سەرکەفتنێ پێشکێش کری و رزگارکرنا وی چیایی ژ دەستێ تەرۆریستێن داعشێ ب رەنگەکێ فەرمی ژ جیھانێ رە راگھاندی.

بنگەھا لالشێ یا رەوشەنبیری ئاماژە دا وێ یەکێ کو، د وێ رۆژێ دە ھێزێن پێشمەرگەیێن کوردستانێ کاری داستانەکا بێھەمپا تۆمار بکن و دۆرپێچا رێخستنا تەرۆریستی یا داعشێ یا ل سەر چیایێ شنگالێ یا چەند مەھان بشکینن. ڤێ سەرکەفتنا مەزن ئێش و ژانێن خووشک و برایێن ئێزیدی، کو د شەرت و مەرجێن مرۆڤی یێن پر خراب دە ل وی چیایی ئاسێ مابوون، ب داوی کرن.

د پارەکا دن یا وێ راگھاندنێ دە ھاتیە گۆتن کو، گۆتارا دیرۆکی یا سەرۆک بارزانی د وێ دەما ھەستیار دە نە تەنێ راگھاندنا سەرکەفتنەکا لەشکەری بوو، بەلکی ژ بۆ ڤەگەراندنا ھێڤیان ژ بۆ دەروونێ ئێزیدیان وەکی کلیلەکا زێرین بوو.

د وێ دەمێ دە، کو خەلکێ دەڤەرێ ژ بەر تاوانێن داعشێ د رەوشەکا ئالۆز دە بوون و ھێڤیا ڤەگەرا بەر ب وارێ خوە وندا کربوون، پەیاما سەرۆک بارزانی باوەری ژ بۆ وان ڤەگەراند و ئاسۆیەکا نوو ژ بۆ پاشەرۆژا شنگالێ و خەلکێ وێ چێ کر.

پشتی کو پێشمەرگەیان چیایێ شنگالێ کۆنتۆرل کری، سەرۆک مەسعوود بارزانی ل رۆژا 23/12/2014ێ ل سەرێ چیایێ شنگالێ گۆتارا سەرکەفتنێ پێشکێش کر و رزگارکرنا وی چیایی ژ دەستێ تەرۆریستێن داعشێ ب رەنگەکێ فەرمی ژ تەڤاھیا جیھانێ رە راگھاند.