دۆرپێچا ل سەر تاخێن شێخ مەقسوود و ئەشرەفیێ گران دبە
تەڤی داخویانیێن ئاگربەستێ یێن د ناڤبەرا ھێزێن ئەولەکاریا ھوندرین (ئاسایش) و ھێزێن حکوومەتا سووریەیێ دە، رەوشا ھەر دو تاخێن کوردان (شێخ مەقسوود و ئەشرەفیێ) ل حەلەبێ بەر ب ئالۆزی و کریزەکە مرۆڤی ڤە دچە. کۆمێن چەکدار یێن گرێدایی حکوومەتا ڤەگوھێزا سووریەیێ دۆرپێچا ل سەر ڤان تاخان توندتر کر و رێیێن سەرەکی ب ساترێن ئاخی گرتن.
ل گۆری ئاگاھیێن کو مەدیایا نێزیکی رێڤەبەریا خوەسەر پارڤە کرنە، کۆمێن چەکدار رێیا چەرخەرێ یا شیھانا کو دچە تاخا شێخ مەقسوود ب ساترێن ئاخی گرتنە. ھەر وھا رێیا د ناڤبەرا تاخێن ئەشرەفیێ و سوریان دە ژی ب بەندێن چەمەنتۆیی ھاتیە ئاستەنگکرن. ژ بەر ڤان گاڤان، تەڤگەرا چوونووھاتنێ ب تەمامی راوەستیە و وەلاتی نەچار دمینن کو ب مەش دەرباسی تاخێن خوە ببن.
ھێزێن دۆرپێچکەر رێ نادن کو کەلووپەلێن خوارنێ، زەرزەوات و پێدڤیێن سەرەکی دەرباسی تاخان ببن. ھات راگھاندن کو ھێزێن حکوومەتێ تەنێ رێ ددن کو خەلک ژ تاخان دەرکەڤە، لێ رێ ل بەر ڤەگەرا وان و دەرباسبوونا ئۆتۆمۆبیلێن کارسازان دگرن.
ئەڤ ئالۆزی پشتی وێ یەکێ ھات کو د 22ێ ڤێ مەھێ دە کۆمێن چەکدار یێن سەر ب حکوومەتا ڤەگوھێز ژ چار ئالیان ڤە ئێریشی شێخ مەقسوود و ئەشرەفیێ کربوون. د ئەنجاما وان ئێریشان دە، ژنەکێ ژیانا خوە ژ دەست دابوو، 17 سڤیل و 6 ئەندامێن ئاسایشێ ژی بریندار بووبوون.
ھێزێن ئەولەکاریا ھوندرین (ئاساییش) تۆھمەتێن کو دبێژن وان شەر دایە دەستپێکرن رەد کرن. ئاساییشێ د داخویانیا خوە دە دیار کر کو تەڤی ھەولدانێن وان یێن ژ بۆ ئارامیێ ژی، کۆمێن دژبەر ئێریش برنە سەر تاخان و وان ژی تەنێ د چارچۆڤەیا “مافێ پاراستنا رەوا” دە بەرسڤ دایە.
