كارێن کۆمیسیۆنا ئاشتیێ دو مەهێن دن هات درێژکرن
کۆمیسیۆنا دەمۆکراسی، براتی و یەکرێزیا نەتەوەیی یا پارلامەنتۆیا ترکیەیێ ب پرانیا دەنگێن ئەندامێن خوە بریار دا کو، کارێ خوە دو مەهێن دن درێژ بکە.
كارێ کۆمیسیۆنا دەمۆکراسی، براتی و یەکیتیا نەتەوەیی یا پارلامەنتۆیا ترکیەیێ دێ د داویا ڤێ سالێ دە بقەدە، لێ ئالیێن د وێ کۆمیسیۆنێ دە راپۆرتا خوە ل سەر گوهەرتنێن قانوونی یێن تێکلداری پێڤاژۆیا ئاشتیێ پێشکێشی سەرۆکێ پارلامەنتۆیێ کر.
مەدیایا ترکیەیێ راگهاند کو، وێ کۆمیسیۆنێ د جڤینا دوهـ (چارشەمێ، 24\12\2025) دە ب پرانیا دەنگێن ئەندامێن خوە بریار دا کو كارێ خوە دو مەهێن دن درێژ بکە.
سەرۆکێ پارلامەنتۆیا ترکیەیێ نومان کورتولموش ژی ژ ئالیێ خوە ڤە د گۆتارەکێ دە ئاماژە دا کو، دڤێ پێنگاڤێن ئاشتیێ ب لەز بێن ئاڤێتن ژ بەر کو دەرفەتەکا دیرۆکی ل پێشیا ترکیەیێ هەیە و دڤێ نەیێ ونداکرن.
ئەو کۆمیسیۆن ژ بۆ ئامادەکرنا بنگەها قانوونی ژ بۆ پێڤاژۆیا بێچەککرنا پهكهكێ و چارەسەرکرنا پرسگرێکان هات دامەزراندن. ئەڤ کۆمیسیۆن هەتا نها 20 جاران جڤیایە.
نیقاش و نێرینێن ئالیان د جڤینا ئیرۆ دە:
جهههپه داخواز دکە کو دانپێدان ب هەبوونا پرسا کوردان بێ دان، قانوونا تەرۆرێ بێ گوهەرتن و ئازادی بێن گارانتیکرن.
دەم پارتی رەخنەیێ ل جهههپێ دکە کو پێشنیارێن کریارکی و بەرچاڤ د راپۆرتێن وان دە نینن و داخوازا راپۆرتەکا بەرفرەهتر دکە.
ئاكهپه و مهههپه تەکەز دکن کو نابە دەستوور و یەکپارچەییا ئاخێ بێن گوهەرتن و وێ پێڤاژۆیێ تەنێ د چارچۆڤەیا “ترکیەیا بێ تەرۆر” دە دبینن.
