“ئۆجالان دخوازە ل گۆر داخوازا ژێ دهێتە کرن پارتیەکا نوو ئاڤابکە”
ل سەر رەوشا عەبدوللاھ ئۆجالان و ھەلوەستا ئۆجالان د پێڤاژۆیا ب ناڤێ “ترکیەیا بێ تەرۆر” دە رووددن گەلەک گۆتوبێژێن جودا تێنە کرن. یەک ژ ڤان گۆتوبێژان یا ھەری بالکێش ھەلوەست و کەسایەتا ئۆجالان ب خوەیە.
ل گۆرا نووچەیەکێ کو د بلۆکا “سەسلی ھەبەر” دە هاتیە، پارلەمەنتەرەکی بەرێ یێ ھەدەپێ د داخویانیەکا خوە دە بەحسا ھەلوەستا ئۆجالان دکە و دبێژە، “ئۆجالان ژ بۆ دەستپێشخەریەکا سیاسی یا نوو ئامادەکاریان دکە”.
سەسلی ھەبەر د نووچەیا خوە دە راگهاند، پارلامەنتەرەکی بەرێ یێ ھەدەپێ، کو نەخوەست ناڤێ وی ئەشکەرە ببە، ب رێیا پەیامەکێ لگەل مە تێکلی دانی و دیار کر کو عەبدوللاھ ئۆجالان د دەمەک نێزیک دە ژ بۆ دەستپێشخەریەکا سیاسی یا نوو ئامادەکاریان دکە.
ل گۆری پارلامەنتەرێ بەرێ، عەبدوللاھ ئۆجالان پلان دکە کو رێخستنا پارتیا دەمێ یا ھەیی ھلوەشینە و ل شوونا وێ رێخستنەکا سیاسی یا نوو ئاڤا بکە. گەلەک کەسایەتیێن کو ھەتا نھا وی پاراستینە د ڤێ رێکخستنا نوو دە جھ ناگرن؛ ب تایبەتی پارێزڤانێن فیمینیست و هەڤرەگەزخوازان دێ هێن دەرخستن. تێ گۆتن کو پێکھاتەیێن ھەیی یێن پارتیا دەمێ بەشەک ژ پارتیا نوو نابن.
ل گۆری چاڤکانیێ، رێخستنا نوو دێ “پارتیەک بت کو ژ ھێلا بنگەھا کوردان ڤە ب ھێسانی بهێت قەبوولکرن، ب کادرۆیەک بچووکتر، ھێسانتر تێ کۆنترۆلکرن و ژ ھێلا ئایدۆلۆژیک ڤە ژ نوو ڤە دێ هێت پێناسەکرن”.
پارلامەنتەرێ بەرێ دبێژە: “ئۆجالان نەچارە ڤێ یەکێ بکە. ژ بەر کو ئیستیخباراتا کوور یا ترکیەیێ ڤێ یەکێ ژ وی دخوازە. گەر گاڤێن جدی نەهاڤێژە و نەگھیژە خالا کو ژ ھێلا ڤێ ئیستیخباراتا کوور ڤە تێ دەستنیشانکرن، ئەو دێ نکاربە مافێ خوە یێ ھێڤیێ ب دەست بخە.”
ل گۆری چاڤکانیێ، ئارمانجا سەرەکی یا ڤێ گاڤێ ئەوە کو ب ئافراندنا قوتبوونەکێ ژ رێخستنا سیاسی یا ھەیی، ھەم د رایا گشتی یا کوردی دە و ھەم ژی د چاڤێن دەولەتێ دە، زەمینەکا سیاسی یا نوو ب ئافرینە.
