شەھیدێن رۆبۆسکێ ژ مە رە دبێژن “ب ھشمەندییەکە نەتەوەیی، ھەڤکارییێن خوە پێک بینن”

نڤێسینگەها راگەھاندنێ یا  پارتییا وەلاتپارێزێن کوردستانێ (PWK):

شەھیدێن رۆبۆسکێ ژ مە رە دبێژن ‘ب ھشمەندییەکە نەتەوەیی، ھەڤکارییێن خوە پێک بینن’

د سالڤەگەرا 14ێ یا کۆمکوژییا رۆبۆسکێ دە، شەھیدێن رۆبۆسکێ، ل ڤێ کۆمکوژییا کو دەولەتا ترکییەیێ کرییە یا کو ھینا ژی وەکە “فایل مەجهوول” مایە تەماشە دکن.

دەولەتا ترکییەیێ، ھەم ئەنجامدەرێ ڤێ کۆمکوژییێ یە، ھەم ھینا ژی قوربانییێن کۆمکوژییێ سووچدار دکە.

شەھیدێن رۆبۆسکێ و ویژدانا مرۆڤاھییێ، ب ئاوایەکی مات مایی تەماشەیی وێ جیھانا کو ل ھمبەری ڤێ کۆمکوژییێ ھینا ژی وەکە کەڕ و کۆران تەڤدگەرن دکە.

بەلێ، شەھیدێن رۆبۆسکێ ل مە، ل یێن دبێژن “ئەم کۆمکوژییا رۆبۆسکێ ژ بیر ناکن” تەماشە دکن.

شەھیدێن رۆبۆسکێ، ل گۆتنێن مە یێن “ئەم شێخ سەعید، سەیید رزا، قازی محەمەد، مەلا مستەفا بارزانی، حەلەبچە و ئەنفالێ ژ بیر ناکن” گوھدار دکن.

شەھیدێن رۆبۆسکێ ل مە، ل یێن دبێژن “ئەم شەھیدێن خوە ژ بیر ناکن”، لێ دیسا ژی ھەر رۆژ ب دەھان کەسان شەھید ددن تەماشە دکن.

شەھیدێن رۆبۆسکێ، ل ئەوێن کو ب ئەزئەزتییا خوە، ب پەرچەبوون و ب ژھەڤکەتنا خوە، دبن سەبەب کو رێیا ئازادییێ زەحەمەتتر و درێژتر ببە تەماشە دکن.

شەھیدێن رۆبۆسکێ، ل ئەوێن کو ب ئەزئەزتییا خوە، ب پەرچەبوون و ب ژھەڤکەتنا خوە، بەرھەمێن ھەموو فەدەکاری، شەھادەت و بەرخوەدانێن گەلێ مە لاواز دکن تەماشە دکن.

ئەوێن کو ژ بۆ یەکتییەکا نەتەوەیی، سەکنەکا نەتەوەیی، ھشمەندییەکا نەتەوەیی چێنەبە و نەکەملە، چ ژ دەستێن وان تێ دکن؛ بەلێ، شەھیدێن رۆبۆسکێ ل وان تەماشە دکن.

باشە، چ ژ مە دخوازن، چ ژ مە دڤێن شەھیدێن رۆبۆسکێ؟

شەھیدێن رۆبۆسکێ، ژ مە رە دبێژن: یێن د ناڤ پارتییەکێ دە دکارن ببن یەک، بلا ببن یەک؛ یێن نکارن ببن یەک، بلا ھەڤکاری و تفاقان بکن؛ یێن نکارن ھەڤکارییان بکن بلا د ناڤ دانوستەندن و دییالۆگان دە بن؛ یێن نکارن دییالۆگان ژی بمەشینن، بلا دژمناتییا ھەڤ نەکن.

شەھیدێن رۆبۆسکێ، ل باکورێ کوردستانێ ل بەندا پارتییەکا خورت، گرسەیی، مللی، دەمۆکراتن؛ ل بەندا تفاقەکا ستراتەژیک یا نەتەوی و دەمۆکراتیک یا خورتن؛ ل بەندا وێ یەکێ نە کو ل سەر داخوازێن بلەز یێن ملەتێ کورد، ھەڤکارییەکابەرفرەھ پێک وەرە و ب ڤێ ھەڤکارییێ ھەموو ئالییێن کوردان ببن تەرەف و مخاتابێن دەولەتا ترکییەیێ.

شەھیدێن رۆبۆسکێ، ل باشوورێ کوردستانێ ل بەندا وێ یەکێ نە کو ب یەکرێزییا گەلێ مە، حکوومەتەکا خورت یا یەکگرتی، مللی، نیشتیمانی بێ ئاڤا کرن و ئەڤ حکوومەت بکاربە یەکتییا دەزگەھێن پێشمەرگە، ئەولەکاری، ئابۆری، دیپلۆماسی، رێڤەبرییێن ھەرێما کوردستانێ پێک بینە، دەستکەفتییێن فەدەرالی بپارێزە و پێشدە ببە و ل گەل بەغدایێ، ل گەل ھەموو دەولەتان وەک یەک ئالییەکی تەڤبگەرن، ببن مخەتاب.

شەھیدێن رۆبۆسکێ، ل رۆژئاڤایێ کوردستانێ ل بەندا وێ یەکێ نە کو برایارێن کۆنفەرانسا قامشلۆیێ یا کو د 26ێ نیسانا 2025ێ دە ل دار کەتبوو بێنە بجیھ ئانین و ئەو شاندا تەمسیلێ یا کو د کۆنفەرانسێ دە ھاتبوو ھلبژارتن، وەک نوونەرێ گەلێ مەیێ رۆژئاڤایێ کوردستانێ ببە مخاتابێ رێڤەبرییا شامێ و ھەموو دەولەتێن جیھانێ.

شەھیدێن رۆبۆسکێ دبێژن، موومکنە کو د ئەنجاما ڤان پێشھاتەیێن ل رۆژھلاتا نێزیک و رۆژھلاتا ناڤین دە، ھندەک فرسەندێن مەزن بێنە بەر دەرییێ خوشک و برایێن مەیێن ل رۆژھلاتێ کوردستانێ. ژ بۆ کو بکاربن ڤان فرسەندان باش بکار بینن و ژ بۆ گەلێ مە دەستکەفتنان بدەست بخن، دڤێت ھێزێن نەتەوەیی یێن ل رۆژھلاتێ کوردستانێ ب ئاوایەکی بەرفرەھ، ھەڤکاری و تفاقێن خوەیێن نەتەوەیی، دەمۆکراتیک پێک بینن.

بەلێ، شەھیدێن رۆبۆسکێ و ھەموو شەھیدێن مە دبێژن، ئیرۆ ژ ھەر دەمێ زێدەتر پێویستی ب وێ یەکێ ھەیە کو ل سەر ھشمەندییا نەتەوەیی، دەمۆکراتیک، ل ھەر پەرچەیەکی کوردستانێ ھەڤکاری و تفاق بێنە ھوونادن؛ د ناڤا ھێزێن ھەر چار پەرچەیێن کوردستانێ و دیاسپۆرایێ دە ژی، تۆر و مەکانیزمایەکا کو بکاربە کۆۆردیناسیۆن، ھەماھەنگی، دییالۆگ، دان و ستەندن، لھەڤخوەدیدەرکەتن، پشتگری، ئالیکاری، شێورا ناڤخوەیی، ب ھەڤ رە دییار کرنا فکر و ھەلوەستێن ھەڤبەش بھوونە ھەیە.

ئەم د وێ باوەری و ھێڤییێ دە نە کو کۆمکوژییا رۆبۆسکێ و قەساس و بەرپرسێن وێ کۆمکوژییێ رۆژەکێ دێ بێنە دارزاندن.

بەلێ، مە کۆمکوژییا رۆبۆسکێ یا کو د شەڤا 28/12/2011ێ دە، ژ ئالییێ دەولەتا ترکییەیێ ڤە ھاتیە ئەنجامدان ژ بیر نەکرییە، ئەم دێ ژ بیر نەکن.

ئەم ڤێ کۆمکوژیێ شەرمەزار دکین.

ژ بۆ کۆمکوژیێن نوو روونەدن، پێویستییا مە ب ھەڤگرتن، ھەڤکاری، تفاقێن نەتەوەیی ھەیە، پێویستییا مە ب وەلاتەکی ئازاد و د وەلاتێ خوەیێ ئازاد دە ب ژیانەکە عادل و ئازاد ھەیە.

ئەم شەھیدێن رۆبۆسکێ و ھەموو شەھیدێن خوە ب رێزداری ب بیر تینن، روحێ وان شاد، جیھێ وان بھەشت بە.

ئەم بانگی نەتەوێن یەکبوویی، کۆنسەیا ئەورووپایێ، مەحکەمەیا مافێ مرۆڤان یا ئەورۆپایێ و دەزگەھێن پەیوەندیدار یێن جیھانێ دکن کو ژ بۆ قەساس و بەرپرسێن ڤێ کۆمکوژیێ بێنە دارزاندن، گاڤێن پێویستی پێ ھەنە باڤێژن.

28/12/2025

نڤێسینگەها راگەھاندنێ یا پارتییا وەلاتپارێزێن کوردستانێ (PWK)