ھەسەدێ پاشخستنا جڤینا مەزلووم عەبدی و ئەحمەد شەرع راگھاند

ناڤەندا راگھاندنێ یا ھێزێن سووریەیا دەمۆکراتیک (ھەسەدێ) پاشخستنا سەردانەکا فەرمی یا شاندەکا دانوستاندنان یا ھەسەدێ ژ بۆ شامێ راگھاند.

بریار بوو کو ئەو سەردان ئیرۆ رۆژا یەکشەمب، 29/12/2025ێ ژ ئالیێ فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی و شاندەکا دانوستاندنان ڤە ھاتبا کرن.

ناڤەندا راگھاندنێ یا ھەسەدێ سەدەما پاشخستنا وێ سەردانێ ب ئامادەکاریێن لۆژیستیکی و تەکنیکی ڤە گرێ دا. ھەروەسا راگھاند کو، د پاشەرۆژێ دە ب رازیبوونا ھەردو ئالیان دێ ژڤانەکێ نوو ژ بۆ وێ سەردانێ هێت دەستنیشانکرن.

د وێ راگھاندنێ دە تەکەز ل سەر وێ یەکێ ھاتیە کرن کو، پاشخستنا وێ سەردانێ رێکا تێکلیان و ئارمانجێن دیارکری قەت ناگوھەرینە، دانوستاندن ل سەر پەیمانا 10ێ ئادارێ نە.

ئەڤ پاشخستن د دەمەکێ دەیە کو، دانوستاندن د ناڤبەرا ھێزێن سووریەیا دەمۆکراتیک (ھەسەدێ) و حکوومەتا شامێ دە بەردەوامن. ئەڤ دانووستاندن د چارچۆڤەیا پەیمانا 10ێ ئادارا 2025ێ دە تێن کرن.

پەیمانا 10ێ ئادارێ ل رۆژا 10ێ ئادارا 2025ێ د ناڤبەرا سەرۆکێ سووریەیێ ئەحمەد شەرع و فەرماندارێ گشتی یێ ھەسەدێ مەزلووم عەبدی دە ھات ئیمزەکرن. ل گۆری پەیمانێ، دڤێت ھەتا داویا ئیسال ھێزێن ھەسەدێ ببن پارەک ژ دەزگەھا بەرەڤانیێ یا دەولەتا سووریەیێ.