گەفا گوھەرتنا دیمۆگرافیێ و بندەستکرنا ئەردێ کوردان زێدەتر بوویە
ئەنجوومەنا پارێزگەھا دیالایێ، بێیی کو قانوون و مادەیا 140ێ یا دەستوورێ ل بەر چاڤان وەربگرە، بریار دایە کو ناحیەیا قەرەتەپەیێ بکە قەزا و برێڤەبرێن یەکینەیێن ئیداری یێن وێ بگوھەرینە. ڤێ یەکێ ژی نیگەرانی ل جەم شێنیێن وێ دەرێ یێن کورد پەیدا کریە و ئەو وێ یەکێ وەکی بزاڤەک ژ بۆ تەمامکرنا پێڤاژۆیا عەرەبیکرن و بندەستکرنا ئەردێن خوە بناڤ دکن.
ل گۆری زانیاران، رێکارێن قەزاکرنا ناحیەیا قەرەتەپەیێ ل دیالایێ ھاتنە تەمامکرن، بێیی کو ژ حکوومەتا ھەرێما کوردستانێ یان کۆمیتەیا مادەیا 140ێ بێ پرسین.
بەرپرسێ ناڤچەیا پارتیا دەمۆکراتا کوردستانێ (پەدەکێ) عەباس کەریم راگھاند: “مخابن، ئەنجوومەنا پارێزگەھا دیالایێ، بێیی کو ڤەگەرە دەستوور و پارلامەنتۆیێ، بریار دایە کو قەرەتەپە ببە قەزا و قایمقامەک ژێ رە بێ دانان.”
عەباس کەریم ئاماژە ژی دا: “ژ بەر کو قەرەتەپە ل دەڤەرا مادەیا 140ێ یە، دڤێت ھەر بریارەک ب ھەڤاھەنگیا د ناڤبەرا بەغدا، ھەولێر و حکوومەتا خوەجھی دە بە، نە کو ب رەنگەکێ یەکالی بێ فەرزکرن.”
وەلاتیێن کوردێن وێ دەڤەرێ ژی ژ ئالیێ خوە ڤە ھایداریێ ددن کو گوھەرتنێن ئیداری نە تەنێ ناڤێن یەکینەیان دگوھەرینن، بەلکی ئارمانج ژێ گوھەرتنا دیمۆگرافیێ و داگیرکرنا ئەردێیە.
سالح محەمەد، کو وەلاتیەکێ وێ دەڤەرێیە، گۆت: “ل ڤێ دەرێ ل بەر چاڤێن ھەر کەسی قانوون تێ بنپێکرن. ئەڤ گوھەرتنێن ئیداری بوونە سەدەما داگیرکرنا ئەردێ کوردان و مانا کوردان ل ڤی سینۆری د خەتەرێ دەیە.”
پشتی بوویەرێن 16ێ جۆتمەھا 2017ێ، دەستھلاتا سەپاندی ل دەڤەرێن کوردستانی یێن دەرڤەیی ھەرێما کوردستانێ گەلەک زەختێن سیاسی و ئیداری ل سەر کوردان چێ کرنە. ئەڤ سیاسەت بوویە سەدەم کو ھندەک ژ شێنیێن رەسەن ئاوارە ببن و نەکارن ڤەگەرن سەر وارێن خوە، ھەروەسا پرسا ئەردێ وەکی پرسگرێکەکا سەرەکی د ناڤبەرا جۆتکارێن کوردان و عەرەبێن ھاوردەکری دە مایە.
