فەرماندارێ گشتی یێ ھەسەدێ مەزلووم عەبدی گھیشت شامێ
فەرماندارێ گشتی یێ ھێزێن سووریا دەمۆکراتیک (ھەسەد)ێ گھیشت شامێ دا کو ل سەر پەیمانا 10ێ ئادارێ ب رایەدارێن سووریێ رە باخڤە.
بەردەڤکێ ھەسەدێ فەرھاد شامی د پۆستەکێ دا ل سەر تۆرا جڤاکی یا X راگهاند کو شاندەیەکا ھێزێن سووریەیا دەمۆکراتیک (ھەسەد)ێ، ئیرۆ 4/1/2026ێ ژ بۆ ھەڤدیتنان لگەل رایەدارێن حکوومەتا سووریێ گھیشت شامێ و ل گەل بەرپرسێن حکوومەتا سووریێ د جڤینێ دە نە.
فەرھاد شامی راگەھاند، شاند ژ ھێلا فەرماندارێ گشتی یێ ھەسەدێ مەزلووم عەبدی ڤە سەرۆکاتیا وێ تێ کرن و د جڤینێ دە دێ میکانیزما ئەنتەگرەکرنا لەشکەری یا ھێزێن ھەسەدێ لگەل ئارتێشا نوویا سووریێ وەرە نیقاش کرن.
ئەندامێن شاندەیێ:
– فەرماندارێ گشتی یێ ھێزێن سووریەیا دەمۆکراتیک مەزلووم عەبدی
– ئەنداما فەرمانداریا گشتی یا ھەسەدێ سۆزدار حاجی.
– ئەندامێ فەرمانداریا گشتی یا ھەسەدێ سیپان حەمۆ
جڤینێ دە جەنەرال کەڤن ژ. لامبەرت، کو فەرماندارێ ئۆپەراسیۆنا چارەسەریا خوەزایییە، دێ بەشداری جڤینێ ببە، کو گرینگیا ناڤنەتەوەیی یا ھەڤدیتنان نیشان ددە
سەردان ژ بۆ 29ێ کانوونێ ھاتبوو پلانکرن، لێ ھێزێن سووریا دەمۆکراتیک (ھەسەدێ) د داخویانیەکێ دە گۆت کو سەردان ژ بەر سەدەمێن تەکنیکی ھاتیە پاشخستن.
ھوورگولیێن پەیمانا 10ێ ئادارێ:
پەیمانا 10ێ ئادارا 2025ێ د ناڤبەرا مەزلووم عەبدی، فەرماندارێ گشتی یێ ھێزێن سووریا دەمۆکراتیک (ھەسەد)ێ و سەرۆکێ سووریێ ئەحمەد شەرع دە پەیمانەک دیرۆکی بوو کو ئارمانج ئەو بوو کو دابەشکرن و یەکبوونا دەڤەرێن د بن کۆنترۆلا رێڤەبەریا خوەسەر دە ب داوی بکە.
پەیمان، کو ب ناڤبەینکاریا دەولەتێن یەکبوویی یێن ئامەریکایێ ھات ئیمزەکرن، چەند خالێن سەرەکی دحەوینە و بریار بوو کو ھەتا داویا سالا 2025 بقەدە:
خالێن سەرەکەیێن پەیمانێ ئەڤ بوون:
1. یەکبوونا لەشکەری و سڤیل: یەککرنا ھەمی سازیێن سڤیل و لەشکەری ل باکورێ رۆژھلاتێ سووریێ (رۆژئاڤایێ کوردستانێ) لگەل رێڤەبەریا دەولەتا سووریێ. ئەڤ دەریێن سینۆر، بالافرگەھ و زەڤیێن پەترۆل و گازێ دحەوینە.
2. مافێن کوردان: جڤاکا کوردان وەکی جڤاتەک خوەجھی ل دەولەتا سووریێ ناس بکن و مافێ وانێ ھەموەلاتیبوونێ و ھەمی مافێن وان یێن دەستووری گارانتی بکن.
3. ئاگربەستەکا بەرفرەھ: سەپاندنا ئاگربەستەکێ ل سەر تەڤاھیا ئاخا سووریەیێ.
4. بەشداریا سیاسی: مسۆگەرکرنا مافێ ھەموو سوورییەییان کو د پێڤاژۆیا سیاسی و ھەموو سازیێن دەولەتێ دە وەرن تەمسیلکرن و بەشدار ببن، بێیی کو پاشخانەیا وان یا ئۆلی و ئەتنیکی ل بەر چاڤان وەرە گرتن.
5. گارانتیا ڤەگەرێ: مسۆگەرکرنا ڤەگەرا ھەموو پەنابەر و کۆچبەرێن سووریەیێ بۆ وەلاتێ خوە و پاراستنا ئەولەھیا وان ژ ئالیێ دەولەتا سووریەیێ ڤە.
6. بەرتەکا گەفان: پشتگریا دەولەتا سووریەیێ د رووبرووبوونا بەرماھیێن رەژیما ئەسەد و ھەموو گەفێن ل سەر ئەولەھی و یەکپارچەییا ئاخا سووریەیێ دە.
