کۆمیسیۆنا ئاشتیێ دەست ب نڤیساندنا راپۆرتا داویێ دکە
تیما نڤیساندنا راپۆرتا پێڤاژۆیا ئاشتیێ یا ل پارلامەنتۆیا ترکیەیێ دجڤە. ئەڤ پێنگاڤ پشتی درێژکرنا دەما خەباتا “کۆمیسیۆنا ھەڤگرتنا نیشتیمانی، براتی و دەمۆکراسیێ” ھات ئاڤێتن و تێ دە نەخشەرێیەکا یاسایی یا ژ بۆ چارەسەریێ تێ ئامادەکرن.
پارلامەنتۆیا ترکیەیێ ب داخویانیەکێ راگھاند، تیما نڤیساندنا راپۆرتا پێڤاژۆیا ئاشتیێ دێ سبە 6ێ چلەیا 2026ێ، روونشتنەکا گرنگ پێک بینە. جڤین دێ ب سەرۆکاتیا سەرۆکێ پارلامەنتۆیێ نومان کورتولموش، کو د ھەمان دەمێ دە سەرۆکاتیا کۆمیسیۆنێ دکە، برێڤە بچە.
د ڤێ تیما نڤیساندنێ دە نوونەرێن ھەر چار پارتیێن مەزن (ئاک پارتی، مھپ، چپ و دەم پارتی) ئامادە نە. ئارمانجا سەرەکەیا جڤینێ ئەوە کو پێشنیارێن د ناڤا دو مەھێن بۆری دە ھاتنە کرن وەرن نیقاشکرن و راپۆرتەکە داوییا کو د ناڤا خوە دە گوھەرتنێن یاسایی ژی دھەوینە، وەرە ئامادەکرن.
جەلال فرات: ‘دڤێت راپۆرت ژ ترسێن ئەولەھیێ دوور بە’
پارلامەنتەرێ دەم پارتیێ جەلال فرات دەربارێ گرنگیا ڤێ راپۆرتێ دە ژ بۆ ئاژانسەکە نێزیکی پارتیا خوە ئاخڤی. فرات تەکەز کر کو ژ بۆ سەرکەفتنا پێڤاژۆیێ دڤێت راپۆرتا داوی راستیا سیاسی، جڤاکی و دیرۆکی یا پرسا کورد ل بەر چاڤان بگرە.
جەلال فرات وھا گۆت: “نابە ئەڤ راپۆرت ل گۆری تێگھشتن و ترسێن ئەولەھیێ یێن دەولەتێ وەرە ئامادەکرن. گەر ئەم چارەسەریەکا بنگەھین دخوازن، دڤێت ئەم جەسارەت بکن و راستیا دیرۆکی و سیاسی بنڤیسن.”
داخوازا گوھەرتنێن بنگەھین د یاسایان دە
فرات بال کشاند سەر وێ یەکێ کو دڤێت ئەڤ راپۆرت تەنێ ل سەر کاغەزێ مینا “شیرەتێن باش” نەمینە و وەھا بەردەوام کر: “پێدڤی ب گوھەرتنێن بەرجەستە د یاسایا سزایێ، یاسایا دژی تەرۆرێ و یاسایا جیبجیکرنا سزایان دە ھەیە. ھەروھا ژ بۆ کو پێشیا سیاسەتا دەمۆکراتیک ڤەببە، دڤێت د ڤێ راپۆرتێ دە داخوازا راکرنا سیستەما قەیوومان ب ئاوایەکی زەلال وەرە کرن.”
